ოცნების პრემიერმინისტრმა, ირაკლი კობახიძემ პირველ არხთან ინტერვიუში, ბათუმელების და ნეტგაზეთის დამფუძნებელს და დირექტორს, მზია ამაღლობელს სავარაუდოდ, აგენტი უწოდა.

მისი თქმით, "უცხოელი აგენტები და მათი პატრონები" წლების განმავლობაში სამართალდამცავი სტრუქტურების "დასუსტებას, დაკნინებას და ჩამოშლას" ცდილობდნენ.

"უცხოელი აგენტების და მათი პატრონების გარდა არავინ აპროტესტებს ამ ფაქტს. რატომ არის განსაკუთრებული აქცენტი, ასეთი მძაფრი რეაქცია ამ შემთხვევაზე — მათთვის მთავარი ამოცანა მთელი ამ წლების განმავლობაში იყო სამართალდამცავი სტრუქტურების დასუსტება, დაკნინება, ჩამოშლა და ა.შ. მათთვის ეს არის რაღაც გარდამტეხი მოვლენა. აქ თუ მიაღწევდნენ წარმატებას სახელმწიფოს წინააღმდეგ, შემდეგ გაგრძელდებოდა ჯაჭვისებურად ეს პროცესი. ნებისმიერმა აგენტმა შეიძლება სახეში გაარტყას პოლიციის უფროსს და ეს ჩვეულებრივად უნდა გაატარო. დადასტურებულია და ფაქტია, რომ ადამიანი სახეში ხელს ურტყამს პოლიციის უფროსს. სცადეთ, ბერლინში პოლიციის უფროსს გაარტყით ხელი, თუ ვინმე გაკმარებთ მცირე სასჯელს და თუ არ მოგიწევთ პატიმრობაში სისხლის სამართლებრივი მუხლით წასვლა. ერთადერთი ქვეყანა შეიძლება ვიყოთ, სადაც 300 კაცით შეიძლება გადაკეტო ცენტრალური გამზირი და მეორე ერთადერთი ქვეყანა, სადაც შეგიძლია, ნებისმიერმა აგენტმა გაარტყას ხელი პოლიციელს და იქ პატიმრობაც არ უნდა იყოს შეფარდებული. სამარცხვინოა ეს ყველაფერი. შეიძლება პატარა ქვეყანა ვიყოთ და ვიღაც გვიყურებდეს, როგორც დაბალ ღობეს, მაგრამ ყველას უნდა ახსოვდეს, რომ ეს არის დამოუკიდებელი, სუვერენული ქვეყანა, რომელსაც აქვს უფლება კანონის უზენაესობასა და სამართლის უზენაესობაზე, ზუსტად ისევე, როგორც გერმანიის, საფრანგეთისა და აშშ-ის სახელმწიფოებს", — თქვა ირაკლი კობახიძემ.