სამედიცინო ცენტრ ურანტის დირექტორმა და თანამშრომლებმა ჯანდაცვის სამინისტროსთან აქციას გამართეს, რომლითაც ფსიქიკური ჯანმრთელობისა და ნარკომანიის პრევენციის ცენტრის ის გადაწყვეტილება გააპროტესტეს, რომლის თანახმადაც, ურანტს ხელშეკრულებას აღარ გაუგრძელებენ.

ურანტის დირექტორმა, ზურა სიხარულიძემ On.ge-ს უამბო, რომ 2014 წლიდან, მას შემდეგ რაც ურანტი წლების განმავლობაში ახორციელებდა მეთადონით ჩანაცვლებით თერაპიას სახელმწიფო და გლობალური პროგრამებს, ის ფსიქიკური ჯანმრთელობისა და ნარკომანიის პრევენციის ცენტრის ქვეკონტრაქტორი გახდა. მისი თქმით, ამ დროიდან ცენტრი და ურანტი მეთადონის პროგრამით პარალელურად უზრუნველყოფდნენ ბენეფიციარებს, რომელთა 60%-ს ცენტრი, 40%-ს კი ურანტი ემსახურებოდა:

"ამ პერიოდში სულ მათი ზეწოლის ქვეშ ვიმყოფებოდით: ორთვიან ტენდერს გვიცხადებდნენ, თანამშრომლები აგვყავდა 2 თვით. ცენტრს სულ ჰქონდა ბერკეტი, რომ აი, შეგიწყვეტთ თუ კარგად არ მოიქცევითო. კარგად მოქცევა კი ნიშნავდა იმას, რომ არ მოგვეთხოვა ზედმეტი გაფართოება, სერვისის გაუმჯობესება და ა.შ. მიუხედავად ამისა, ამ პერიოდში საკმაოდ ბევრი რაღაც გავაკეთეთ პაციენტებისთვის, ძალიან საინტერესო ტექნოლოგია შევქმენით და ა.შ. ბოლო ტენდერი მთავრდება 30 ივნისს და ჩვენ აღარ გამოგვიცხადეს ახალი ტენდერი, რის შესახებაც სოციალური ქსელით და ტელევიზიით შევიტყეთ".

სიხარულიძემ აგვიხსნა, რომ მისი ცენტრი ზემოაღნიშნული სერვისით პაციენტებს 2005 წლიდან უზრუნველყოფდა და ურანტი იყო პირველი, ვინც საქართველოში მეთადონის პროგრამის განხორციელება დაიწყო. მისი განმარტებით, 2008 წელს, მან, თავის კოლეგებთან ერთად სახელმწიფო პროგრამის განხორციელება დაიწყო:

"პრაქტიკულად ყველა სახელმწიფო ცენტრი საქართველოში არის ჩემი გახსნილი. მომსახურებას ახორციელებდა ფსიქიკური ჯანმრთელობისა და ნარკომანიის პრევენციის ცენტრი და ჩვენც ვიყავით ერთ-ერთი ნაწილი. როდესაც მივხვდით, რომ მათ კარგი მენეჯმენტი არ ჰქონდათ, 2013 წელს ხელისუფლების ცვლილების შემდეგ, ჩვენ გამოვეყავით ფსიქიკური ჯანმრთელობისა და ნარკომანიის პრევენციის ცენტრს და გავხდით დამოუკიდებლები, მოქმედებდა ვაუჩერული სისტემა. ანუ ჩვენ ვახორციელებდით ჩვენს საქმიანობას უშუალოდ სახელმწიფო სახსრებით, ბიუჯეტიდან".

სიხარულიძის განმარტებით, სწორედ სახელმწიფოს მიერ გამოყოფილი თანხებითა და გლობალური ფონდის დაფინანსებით, დამატებითი განყოფილებების გახსნა შეძლეს, რომელთა რაოდენობა ახლა 6-ია. აღნიშნული სამედიცინო დაწესებულებები 1300 პაციენტს ემსახურება.

სიხარულიძის თქმით, 2014 წელს გადაწყდა, რომ ვინაიდან პროგრამის მხოლოდ 2 განმახორციელებელი, ურანტი და ზემოაღნიშნული ცენტრი არსებობდა, შექმნილიყო ლოკალური ბიუჯეტი, რომ სხვა მიმწოდებლებიც არ ჩართულიყვნენ აღნიშნული პროგრამის განხორციელებაში. მისი თქმით, სწორედ ამ დროიდან ახორციელებს ფსიქიკური ჯანმრთელობისა და ნარკომანიის პრევენციის ცენტრი ზეწოლას ურანტზე და უცხადებს მას მხოლოდ ორთვიან ტენდერებს, რომელთაგან ბოლოს 30 ივნისს გასდის ვადა, ახალი კი აღარ გამოცხადდება.

სიხარულიძე ამბობს, რომ ტენდერის არგამოცხადება ნიშნავს, რომ მისი უამრავი თანამშრომელი დარჩება უმუშევარი, სახელმწიფო პროგრამაში ჩართულ 930 პაციენტს კი მომსახურებას ვეღარ გაუწევენ.

თავის მხრივ, ფსიქიკური ჯანმრთელობისა და ნარკომანიის პრევენციის ცენტრის დირექტორის, ლაშა კილაძის მიერ ზურა სიხარულიძისათვის მიწერილ წერილში წერია, რომ 2016 წლის 1 ივლისიდან ცენტრი მეთადონის პროგრამის განხორციელებას განაგრძობს ექსკლუზიურად, ქვეკონტრაქტორის გარეშე.

კილაძის განმარტებით, ურანტში მეთადონის ჩანაცვლებითი თერაპიის პროგრამაში დასაქმებულ პირებს, ცენტრი ჩანაცვლებითი თერაპიის განყოფილებებში დასაქმებას სთავაზობს.

ცენტრი მიიჩნევს, რომ აღნიშნული გადაწყვეტილება ემსახურება თანხების დაზოგვასა და მეთადონის პროგრამით მეტი ბენეფიციარის უზრუნველყოფას. ამასთან, კილაძე განმარტავს, რომ პაციენტები, რომლებსაც ახლა ურანტი ემსახურება, არ დაზარალდებიან, რადგან მათ ცენტრი მოემსახურება.