საპროტესტო აქციების დროს დაკავებული მსახიობი ანდრო ჭიჭინაძე თეატრალური უნივერსიტეტის სტუდენტებისთვის სტატუტის შეჩერებას ეხმაურება. ჭიჭინაძის განცხადებას მისი ადვოკატი, თორნიკე მიგინეიშვილი ავრცელებს.

"დიდი ხანია თავს ვიკავებ განცხადების გაკეთებისგან. რადგან ყოველთვის ვერიდები "ღია დაპირისპირებაში შესვლას", ვაპირებდი გიორგი შალუტაშვილთან დალაპარაკებას გამოსვლის შემდეგ. კითხვები მქონდა იმასთან დაკავშირებით, თუ როგორ ექცევიან ჩემს მეგობრებს, ღირსეულ ადამიანებს!

რასაც აკეთებენ მთელი ამ დროის განმავლობაში, სრულიად მიუღებელია! არის და აქამდეც იყო! განსაკუთრებით იმ ადამიანისგან, რომელმაც საბჭოთა კავშირის დროს გაბედა და დაუპირისპირდა სისტემას! ყველაფერს თავი რომ დავანებოთ, კარგი და პატივსაცემი ურთიერთობა მქონდა მასთან. აქ ეს ბოლო ხარისხოვანია! წითელი ხაზია, როცა პრინციპულ, ერთგულ, თავისუფალ ადამიანებს ასე ექცევი!!!

პოლიციას გამოუძახე?! ვისთვის?! ჩემთვის ყველა კითხვას პასუხი გაეცა!

იმედია, აღარასოდეს შევხვდებით და შოთა რუსთაველის სახელობის თეატრის და კინოს უნივერსიტეტი გახდება ღირსეული სივრცე!!!," — წერს ანდრო ჭიჭინაძე ციხიდან.

შეგახსენებთ, 10 მარტმა თეატრალური უნივერსიტეტის სტუდენტური მოძრაობის ნაწილმა შეტყობინება მიიღო სტუდენტის სტატუსის შეწყვეტაზე.

მოგვიანებით, საქართველოს შოთა რუსთაველის თეატრისა და კინოს სახელმწიფო უნივერსიტეტმა სოციალურ ქსელში განცხადება გაავრცელა. სადაც ნათქვამია, რომ რექტორის მიერ ბრძანება სტუდენტების სტატუსის შეწყვეტის შესახებ ჯერ არ არის გამოცემული. სტუდენტებს აქვთ უფლება გაასაჩივრონ ეთიკის კომისიის გადაწყვეტილება და წერილობით მიმართონ რექტორს, სამი სამუშაო დღის განმავლობაში. რექტორს კი ერთი თვის აქვს ვადა თითოეული სტუდენტის საქმის განსახილველად და საბოლოო გადაწყვეტილების მისაღებად.