დღეს თეატრალური უნივერსიტეტის სტუდენტური მოძრაობის წევრებმა თქვეს, რომ მათ ნაწილს უნივერსიტეტის ეთიკის კომისიამ სტუდენტის სტატუსი შეუწყვიტა.

"როგორც თქვენთვის ცნობილია, გაიმართა ეთიკის კომისიის სხდომა, სადაც განხილული იყო სტუდენტების მხრიდან უნივერსიტეტის ეთიკის კოდექსით გათვალისწინებული ნორმების დარღვევის საკითხი. გაცნობებთ, რომ ეთიკის კომისიის გადაწყვეტილებით, თქვენ შეგიწყდათ სტუდენტის სტატუსი", — წერია შეტყობინებაში, რომელიც სტუდენტებმა ადმინისტრაციისგან მიიღეს.

ჩვენ წავიკითხეთ თეატრალური უნივერსიტეტის ეთიკის კოდექსი, რომელიც ოფიციალურ ვებგვერდზეა გამოქვეყნებული და ბოლოს 2023 წელს გაახლდა.

ეთიკის კოდექსი ძირითადად თანამშრომლების, ლექტორების და მოწვეული ლექტორების ქცევის წესებს არეგულირებს. მასში არაფერია ნათქვამი პროტესტის გამოხატვის ან მისი შეზღუდვის შესახებ. მეტიც, ეთიკის კოდექსში არის ჩანაწერი, რომ თეატრალური უნივერსიტეტის თანამშრომელი ვალდებულია, პატივი სცეს სხვა პირის სიტყვის, აზრისა და გამოხატვის თავისუფლებას. სტუდენტებზე კი მხოლოდ "სტუდენტების პასუხისმგებლობის" თავში ვკითხულობთ, "სტუდენტის მიმართ დისციპლინური წარმოების დაწყება არ უნდა ზღუდავდეს სტუდენტის უფლებას, მონაწილეობა მიიღოს სასწავლო პროცესში, გარდა იმ შემთხვევებისა, თუ ეს საფრთხეს უქმნის სხვისი უფლებების, ჯანმრთელობის, საგანმანათლებლო დაწესებულების საკუთრებისა და უსაფრთხოების დაცვას."

რაც შეეხება დისციპლინური წარმოების დაწყების პროცესს, აქვე ვკითხულობთ, რომ სტუდენტს უფლება აქვს, დაესწროს თავისი საქმის განხილვას, თუმცა ამის შესაძლებლობა უნივერსიტეტს მათთვის არ მიუცია. აი, რისი უფლება აქვს სტუდენტს, თეატრალური უნივერსიტეტის ეთიკის კოდექსის მიხედვით:

12.7 დისციპლინური წარმოების განხორციელებისას სტუდენტს უფლება აქვს:

ა) წერილობითი ფორმით მიიღოს დასაბუთებული გადაწყვეტილება მის მიმართ დისციპლინური წარმოების დაწყების შესახებ;

ბ) დაესწროს დისციპლინური წარმოების საკითხის განხილვას და ისარგებლოს დაცვის უფლებით;

გ) მიაწოდოს უმაღლესი საგანმანათლებლო დაწესებულების შესაბამის ორგანოს თავის ხელთ არსებული ინფორმაცია და მტკიცებულებები;

დ) მონაწილეობა მიიღოს უნივერსიტეტის შესაბამისი ორგანოს მიერ მოპოვებული მტკიცებულებების გამოკვლევაში;

ე) მოითხოვოს, მის მიმართ დისციპლინური წარმოების საკითხი განხილულ იქნეს საჯარო სხდომაზე.

თეატრალური უნივერსიტეტის სტუდენტური მოძრაობა სამი თვეა, რაც უნივერსიტეტის ფოიეში სოლიდარობას გამოხატავს რეჟიმის წინააღმდეგ ბრძოლაში დაშავებული თუ უკანონოდ დაკავებული ადამიანების მიმართ და მათ დაუყოვნებლივ გათავისუფლებას ითხოვს.

ცოტა ხნის წინ თეატრალურმა უნივერსიტეტმა განცხადება გაავრცელა, სადაც აღნიშნა, რომ ეთიკის კომისიის გადაწყვეტილებას ჯერ რექტორის ხელმოწერა არ აქვს, ხოლო ამ გადაწყვეტილების გასაჩივრება სტუდენტებს 3 დღის ვადაში შეუძლიათ.