თანაინვესტირების ფონდის ყოფილი ხელმძღვანელის, გიორგი ბაჩიაშვილისთვის საზღვრის უკანონო გადაკვეთაში დახმარების ფაქტზე ბრალდებული 48 წლის შოთა ქარუმიძე ბრალს აღიარებს.

"გუშინ წაუყენეს ბრალი საზღვრის უკანონო კვეთაში დახმარებაზე. ის დაეთანხმა ბრალს, აღიარებს წარდგენილ ბრალდებას. ინფორმაცია მიწოდებული აქვს მოწმის სახით, როგორც ბრალდებულს ინფორმაცია არ მიუწოდებია, უბრალოდ დაეთანხმა ბრალს," — განაცხადა ბრალდებულის ადვოკატმა, ალექსანდრე ამირხანაშვილმა.

ამირხანაშვილის ცნობით, ქარუმიძეს გამოძიებისთვის ინფორმაცია, როგორც მოწმეს, აქვს მიწოდებული. ადვოკატმა ასევე განაცხადა, რომ მისი დაცვის ქვეშ მყოფი ეჭვობს და დანამდვილებით არ იცის მას ბაჩიაშვილის მამა ესაუბრებოდა თუ არა. მისივე თქმით, ბრალდებულს ბაჩიაშვილის მამა, ალექსანდრე ბაჩიაშვილი არ უნახავს. მას მხოლოდ ტელეფონით ესაუბრა.

"ამ დეტალებზე არ მისაუბრია, ვერც დავადასტურებ, ვერც უარვყოფ, რაც მოვასწარი მასთან საუბარი იმის მიხედვით, ის ეჭვობს, რომ მას ბაჩიაშვილის მამა ესაუბრა, თუმცა, ის თვალით არ უნახავს, უშუალოდ ბაჩიაშვილს შეხვდა, სხვას არავის," — განაცხადა ამირხანაშვილმა.

ადვოკატმა ასევე დასძინა, რომ სასამართლოს ქარუმიძის მიმართ აღკვეთის ღონისძიების სახით გირაოს გამოყენებას შესთავაზებს.

შეგახსენებთ, 6 მარტს შინაგან საქმეთა სამინისტრომ გაავრცელა სქემა, რომლითაც 2 მარტს გიორგი ბაჩიაშვილმა საქართველოს საზღვრის გადაკვეთა შეძლო. უწყების ცნობით, შოთა ქარუმიძე ბაჩიაშვილისთვის თანხის სანაცვლოდ დათანხმდა ავტომობილში სპეციალურად მოწყობილი სამალავით, საქართველოს სახელმწიფო საზღვარზე სომხეთის მიმართულებით მალულად გადაყვანას. გამოძიებით ასევე დგინდება, რომ ფინანსური სარგებლის გარდა ბაჩიაშვილმა დაკავებულს ასევე სხვა პირის გადაყვანაც შესთავაზა, რის შემდეგაც მათ შორის შეთანხმება შედგა.

"დაკავებულს ბრალდება სსკ-ის 25, 344-ე მუხლის პირველი ნაწილით (საქართველოს სახელმწიფო საზღვრის უკანონოდ გადაკვეთაში დახმარება) წარედგინა, რაც სასჯელის სახედ 3-დან 5 წლამდე თავისუფლების აღკვეთას ითვალისწინებს," — ვკითხულობთ უწყების განცხადებაში.

ასევე იხილეთ:

შსს ავრცელებს სქემას, რომლითაც ბაჩიაშვილმა საქართველოს საზღვრის გადაკვეთა შეძლო — დაკავებულია 1 პირი.

"მივიღე სანდო ინფორმაცია ჩემს უსაფრთხოებაზე რეალური საფრთხეების შესახებ" — გიორგი ბაჩიაშვილი საქართველოს ტოვებს