ოცნების პარლამენტის თავმჯდომარე შალვა პაპუაშვილი ჟურნალისტებთან ესტონეთის მიერ ქართველ პოლიციელებზე, მოსამართლეებსა და პროურორებზე დაწესებულ სანქციებს გამოეხმაურა. მან ესტონეთის საგარეო საქმეთა მინისტრ მარგუს ცაჰკნას "თავქარიანი" უწოდა და თქვა, რომ მას "წარმოდგენა არ აქვს ქართველი პოლიციელების სახელებზე და გვარებზე და სანქცირებულთა სია შედგენილია ესტონური NGO "საერთაშორისო გამჭვირვალობის" მიერ მათი მთავრობის დავალებით".

პაპუაშვილის თქმით, ბალტიისპირების ქვეყნებს საქართველოს კანონიერი ხელისუფლების შეცვლა სურთ.

"იცით, რომ ერთის მხრივ, ნახევრად აღიარების, თუ არაღიარების რეჟიმში არიან ქართველი ხალხის ნების მიმართ და ვხედავთ, ასევე ბოლო დღეებში სანქციებს. სანქციები დაწესდა იმ დროს, როდესაც იმ დედაქალაქებში იმყოფებოდა ოპოზიცია და არასამთავრობო ორგანიზაციები, ესტონურები, როგორც საბოლოო ჯამში გამოჩნდა. სიაც ფაქტია, ესტონეთის საგარეო საქმეთა თავქარიან მინისტრს წარმოდგენა არ აქვს ქართველი პოლიციელების სახელებზე და გვარებზე, ხომ გასაგებია? ეს სია შედგენილი არის ესტონური NGO-ს "საერთაშორისო გამჭვირვალობის" მიერ მათი მთავრობის დავალებით. მიზანი არის ნათელი, რაც ამ სამ ქვეყანას, მათ ხელისუფლებებს საქართველოს მიმართ აქვს, ეს არის კანონიერი ხელისუფლების შეცვლა. როგორც ჩანს, სურვილი არის, საქართველოში მოვიდეს ისეთი ხელისუფლება, რომელიც ივლის მათ ჭკუაზე. მე ამაზე დავწერე კიდევაც, რომ მიზანი სხვა არის — ამ სამ ხელისუფლებას საქართველოს მიმართ აქვს ერთადერთი ინტერესი, ეს ინტერესი მდგომარეობს იმაში, რომ ჩვენ ვიყოთ იარაღი და ინსტრუმენტი რუსეთის წინააღმდეგ. ამ სამ პოსტსაბჭოთა ქვეყანას აქვს თავისი შიშები რუსეთთან მიმართებაში და იმის ნაცვლად, რომ თამამად დადგნენ, ამ შიშებს გაუმკლავდნენ და თუ ბრძოლა უნდათ იბრძოლონ, ცდილობენ სხვა ქვეყნების ხელით, სხვა ხალხების ხელით რუსეთს ყურადღება გადაატანინონ სხვა საკითხებზე", — განაცხადა პაპუაშვილმა.