6 მარტს, თბილისის საქალაქო სასამართლოში თანაინვესტირების ფონდის ყოფილი გენერალური დირექტორის, გიორგი ბაჩიაშვილის სასამართლო პროცესი გაიმართა.

მოსამართლე გიორგი გელაშვილმა ბაჩიაშვილის ადვოკატის, ლევან მახარაშვილის შუამდგომლობა არ დააკმაყოფილა და საქმე არც ამჯერად — უსაფუძვლობის გამო არ აიცილა. ამას გარდა, დღევანდელ სხდომაზე პროკურორმა კრიპტოვალუტის მითვისების საქმეზე აღკვეთის ღონისძიების სახით შეფარდებული 2 500 000-ლარიანი გირაოს პატიმრობით შეცვლა მოითხოვა. მოსამართლემ პროკურორის ეს შუამდგომლობა დააკმაყოფილა და ბაჩიაშვილისთვის შეფარდებული 2 500 000-ლარიანი გირაოს თანხის ამოსაღებად ბრალდებულისა და ბრალდებულის მამის ალექსანდრე ბაჩიაშვილის საკუთრებაში არსებული ქონება, აღსასრულებლად წარმოებაში მიექცა.

მოსამართლე გიორგი გელიაშვილმა ბაჩიაშვილის დისტანციურად დაკითხვის და მისი გამოკითხვის ოქმის გამოკვლევის არც ერთი შუამდგომლობა არ დააკმაყოფილა. ბაჩიაშვილის ადვოკატის განცხადებით, "ბრალდებულს შიში ჰქონდა, რომ სასამართლო ვერ უზრუნველყოფდა მისი უფლებების დაცვას", რომ სასამართლომ ბაჩიაშვილის "შიშები" არ მოისმინა და მისი ლეგიტიმური ეჭვების გასაფანტად არაფერი გააკეთა. ამ მიზეზების გამო ადვოკატმა მახარაშვილმა მოსამართლის აცილების შუამდგომლობაც დააყენა, რაც სასამართლომ არ დააკმაყოფილა.

შეგახსენებთ, გიორგი ბაჩიაშვილს ბიძინა ივანიშვილის კრიპტოვალუტის მითვისებას ედავებიან, რაზეც აღკვეთის ღონისძიების სახით 2 500 000-ლარიანი გირაო ჰქონდა შეფარდებული.

დღევანდელ სხდომაზე პროკურორმა ბაჩიაშვილის მიმართ შეფარდებული გირაოს პატიმრობით შეცვლა მოითხოვა, რაც სასამართლომ დააკმაყოფილა. აღნიშნული ქმედება 9-დან 12-წლამდე თავისუფლების აღკვეთას ითვალისწინებს.

გიორგი ბაჩიაშვილი წარდგენილ ბრალდებაში თავს დამნაშავედ არ მიიჩნევს.

ცნობისთვის, გიორგი ბაჩიაშვილს აღნიშნული საქმის გარდა ბრალი კიდევ ორ საქმეზე — "მტკვარი ჰესის" და საზღვრის უკანონო კვეთის საქმეზე აქვს წაყენებული. ორივე საქმეში ბიძინა ივანიშვილი ფიგურირებს.

შეგახსენებთ, გიორგი ბაჩიაშვილს, რომელმაც საქართველო, 4 მარტს დაატოვა, აღკვეთის ღონისძიების სახით პატიმრობა დაუსწრებლად შეეფარდა. მანამდე პროკურატურამ გიორგი ბაჩიაშვილს საზღვრის უკანონო კვეთის ფაქტზე ბრალდება წარუდგინა.

ასევე იხილეთ:

გიორგი ბაჩიაშვილს საზღვრის უკანონო გადაკვეთისთვის პატიმრობა დაუსწრებლად შეეფარდა