თბილისის მერმა კახა კალაძემ დღეს ჟურნალისტებთან ისაუბრა თვითმმართველობის არჩევნებზე და განაცხადა, რომ ქართულ ოცნებას მზადება უკვე დაწყებული აქვს და დარწმუნებულები არიან, რომ გაიმარჯვებენ.

"თვითმმართველობის არჩევნებს რაც შეეხება, ჩვენ დაწყებული გვაქვს მზადება. მნიშვნელოვანია თვითმმართველობის არჩევნები. დარწმუნებული ვარ, ქართულ ოცნებას ექნება დიდი მხარდაჭერა. ოპოზიციის გეგმებზე არ მაქვს არანაირი ინფორმაცია, ალბათ, მათ უნდა ჰკითხოთ. თუმცა მათ არანაირი შანსი არ აქვთ თვითმმართველობის არჩევნებზე მიაღწიონ წარმატებას. ეს არის რადიკალური დაჯგუფება, რომლებიც ძირითადად დავალებებს გარედან იღებენ, ემსახურებიან უცხოურ ძალებს, ატარებენ სხვა ქვეყნის ინტერესებს. რა თქმა უნდა, ასეთ მოღალატეობრივ, უსამშობლო დაჯგუფებას საზოგადოება ყოველთვის გასცემს შესაბამის პასუხს", — განაცხადა კალაძემ.

კახა კალაძემ კომენტარი გააკეთა უკრაინის მიერ მისთვის უკრაინის სპორტის საერთაშორისო კლასის ოსტატის წოდების ჩამორთმევაზე — კალაძის თქმით, მან საერთოდ არ იცოდა, ასეთ წოდებას თუ ფლობდა და "ეს მნიშვნელოვანი არაა".

"გულწრფელად მინდა ვთქვა, საერთოდ არ ვიცოდი აღნიშნული სტატუსის შესახებ, თუ მისი მფლობელი ვიყავი, ნამდვილად არ ვიცოდი, არ არის ეს საინტერესო", — განაცხადა კახა კალაძემ.