უკრაინის პრეზიდენტი ვოლოდიმირ ზელენსკი X-ზე პოსტს აქვეყნებს, რომელშიც მზადყოფნას გამოთქვამს, იმუშაოს აშშ-ის პრეზიდენტ დონალდ ტრამპთან ერთად მშვიდობის მისაღწევად. ასევე, ზელენსკი მადლობას უხდის ამერიკის შეერთებულ შტატებს და სინანულს გამოთქვამს 28 თებერვალს თეთრი სახლის ოვალურ კაბინეტში მომხდარი ინციდენტის გამო.

"მსურს კიდევ ერთხელ გავუსვა ხაზი, რომ უკრაინა ესწრაფვის მშვიდობას.

არც ერთ ჩვენგანს არ სურს დაუსრულებელი ომი. უკრაინა მზად არის, რაც შეიძლება სწრაფად დაჯდეს მოლაპარაკებების მაგიდასთან იმისთვის, რომ დავაჩქაროთ ხანგრძლივი მშვიდობის მიღწევა. არავის სურს მშვიდობა უკრაინელ ხალხზე მეტად. მე ჩემს გუნდთან ერთად მზად ვარ, ვიმუშაო პრეზიდენტ ტრამპის მძლავრი ლიდერობით ხანგრძლივი მშვიდობის მისაღწევად.

ჩვენ მზად ვართ, ვიმუშაოთ სწრაფად ომის დასასრულებლად, რის თავდაპირველ ეტაპადაც, შესაძლოა, ტყვეთა გათავისუფლება იქცეს — ასევე, სასწრაფო დაზავება ცაში: რაკეტების, შორი მანძილების დრონების, ენერგეტიკული და სამოქალაქო ინფრასტრუქტურის დაბომბვების აკრძალვა — ასევე, დაუყოვნებლივ დაზავება ზღვაში, თუ ამას რუსეთიც იზამს. ჩვენ გვსურს, ძალიან სწრაფად გავიაროთ ყველა შემდეგი ეტაპი აშშ-სთან ერთად და მივიდეთ მყარ და საბოლოო შეთანხმებამდე.

ჩვენ ნამდვილად ვაფასებთ, რაც ამერიკამ გააკეთა უკრაინის სუვერენიტეტისა და დამოუკიდებლობის შესანარჩუნებლად და გვახსოვს ის გარდამტეხი მომენტი, როცა პრეზიდენტმა ტრამპმა უკრაინას გადასცა ჯაველინები. ჩვენ ამისთვის მადლიერები ვართ.

ჩვენი შეხვედრა ვაშინგტონში, თეთრ სახლში, ისე არ წარიმართა, როგორც საჭირო იყო. საწყენია, რომ ეს მოხდა. საჭიროა ყველაფერი სწორად ვქნათ. ჩვენ ვისურვებდით, რომ მომავალში თანამშრომლობა და ურთიერთობა იყოს კონსტრუქციული.

რაც შეეხება შეთანხმებას მინერალებსა და უსაფრთხოებაზე, უკრაინა მზად არის მას ხელი მოაწეროს ნებისმიერ დროს, ნებისმიერ სასურველ ფორმატში. ჩვენ ამ შეთანხმებას განვიხილავთ უსაფრთხოების განმტკიცებისა და უსაფრთხოების საიმედო გარანტიებისკენ გადადგმულ ნაბიჯად და იმედი გვაქვს, რომ ის ეფექტიანად იმუშავებს", — წერს ვოლოდიმირ ზელენსკი X-ზე.