უკრაინელი პოლიტიკოსები ეხმაურებიან CNN-ის მიერ გავრცელებულ ინფორმაციას, რომლის მიხედვითაც აშშ-მა უკრაინისათვის სამხედრო დახმარების მიწოდება დააპაუზა. მიხაილო პოდოლიაკმა, ოლექსი გონჩარენკომ და დენის შმიგალმა საკითხთან დაკავშირებით განსხვავებული მოსაზრებები გამოთქვეს.

ასევე იხილეთ: CNN: დონალდ ტრამპი უკრაინის სამხედრო დახმარებას აპაუზებს

უკრაინის პრემიერმინისტრი დენის შმიგალი დარწმუნებულია, რომ აშშ უკრაინის მხარდაჭერას გააგრძელებს და უკრაინაც ყველაფერს გააკეთებს, რომ "უმსხვილეს სტრატეგიულ პარტნიორთან" ურთიერთობები დაალაგოს.

"აშშ ჩვენი სტრატეგიული და ძალიან მნიშვნელოვანი პარტნიორია. შტატების მადლიერები ვართ და ყველაფერს გავაკეთებთ, რომ ჩვენი თანამშრომლობა გაგრძელდეს ისე, როგორც აქამდე იყო — დიპლომატიურად და მშვიდად. ჩვენ ამაზე ვმუშაობთ და აშშ-ის პრეზიდენტის ადმინისტრაციასთან და კონგრესთან კონტაქტი მუდმივად გვაქვს. დარწმუნებული ვარ, რომ ერთად მივაღწევთ მშვიდობას უკრაინაში", — განაცხადა დენის შმიგალმა.

რაც შეეხება უკრაინის პრეზიდენტის ადმინისტრაციის უფროს მრჩეველს, მიხაილო პოდოლიაკს, მისი თქმით, ომში მყოფმა ქვეყანამ უნდა დაიწყოს ევროპის ქვეყნებიდან ალტერნატიული შეიარაღების მოძიებაზე მუშაობა და ტექნოლოგიური ანალოგების ძიება.

"რაც შეეხება იარაღის მიწოდებას, პირველ რიგში, აუცილებელია შეფასდეს, რომელი კონკრეტული პროგრამები შეწყვეტს მუშაობას, იმის გათვალისწინებით, რომ ბევრი დასკვნით საფეხურზე იყო. ისიც უნდა გვახსოვდეს, რომ ზოგიერთი პროგრამა დაამტკიცა კონგრესმა, რაც განსხვავებულ იურიდიულ პროცედურას გულისხმობს. ასევე, ჩვენ უნდა შევაფასოთ ჩვენი ევროპელი პარტნიორებისგან ანალოგების შეძენის, ან მიღების შესაძლებლობა, მით უმეტეს, რომ ჩანაცვლების პროგრამები უკვე მოქმედებს. მესამე, არ უნდა დაგვავიწყდეს, რომ უკრაინამ უკვე განიცადა აშშ-ის სამხედრო დახმარების პროგრამების ხანგრძლივი შეჩერება და ასეთ სიტუაციებთან შეგუება ისწავლა", — დაწერა პოდოლიაკმა პირად ტელეგრამ არხში.

სიტუაციას ყველაზე კრიტიკულად უკრაინის ევროპული სოლიდარობის პარტიის წევრი ოლექსი გონჩარენკო გამოეხმაურა. BBC-ისთვის მიცემულ ინტერვუში უკრაინელმა პოლიტიკოსმა განაცხადა, რომ ვოლოდიმირ ზელენსკიმ დონალდ ტრამპსა და აშშ-ს ბოდიში უნდა მოუხადოს.

"ის სხვაგვარად უნდა მოქცეულიყო — ეს საბავშვო ბაღი ან კრივი არ არის. ეს მილიონობით ადამიანის სიცოცხლეს ეხება. რა უფრო მნიშვნელოვანია — პრეზიდენტი ზელენსკის სიამაყე თუ მილიონობით ადამიანის სიცოცხლე, რომლებზეც ის პასუხისმგებელია? მან ბოდიში უნდა მოიხადოს", — განაცხადა გონჩარენკომ.