მილი ბობი ბრაუნი თავის გარეგნობასთან დაკავშირებულ კრიტიკას ეხმაურება. ბრიტანელმა მსახიობმა, რომელსაც მეტწილად ნეტფლიქსის Stranger Things-ში მონაწილეობით იცნობენ, ინსტაგრამზე თითქმის სამწუთიანი ვიდეო გამოაქვეყნა და მედიაში მის შესახებ დაწერილი სტატიები განიხილა.

ბრაუნის თქმით, ეს პრობლემა ეხება მხოლოდ მას კი არა, არამედ "ყველა გოგოს, რომელიც საზოგადოების თვალწინ იზრდება". მსახიობი 10 წლის იყო, როცა საყოველთაო პოპულარობა მოიპოვა.

"მთელი მსოფლიოს თვალწინ გავიზარდე, თუმცა, რატომღაც, ხალხი ჩემთან ერთად არ გაზრდილა", — ამბობს ბრაუნი, — "ისე იქცევიან, თითქოს, დროში უნდა გავყინულიყავი და ისევ ისე გამოვიყურებოდე, როგორც Stranger Things-ის პირველ სეზონში. და რადგან ასე არაა, ახლა სამიზნედ ვიქეცი".

მსახიობმა ვიდეოში წაიკითხა სხვადასხვა გამოცემის მიერ მისი გარეგნობის ცვლილებაზე დაწერილი სტატიების სათაურები და მათი ავტორების სახელები.

"ძალიან სამწუხაროა, რომ ზრდასრული ჟურნალისტები თავიანთ დროს ჩემი სახის, სხეულის თუ გადაწყვეტილებების განხილვას ახარჯავენ", — აღნიშნავს ახალგაზრდა ვარსკვლავი, — "კიდევ უფრო უსიამოვნოა, რომ ზოგიერთი ეს სტატია ქალის დაწერილია. სულ ახალგაზრდა ქალების მხარდაჭერასა და გამხნევებაზე ვსაუბრობთ ხოლმე, მაგრამ საქმე საქმეზე რომ მიდგება, ადვილად გაგწირავენ კლიკების გულისთვის".

"ეს ჟურნალისტიკა კი არა, ბულინგია", — ამატებს ბრაუნი.

ფოტო: Axelle/Bauer-Griffin

ჟურნალ Vanity Fair-თან უახლეს ინტერვიუში, მსახიობმა ასევე თქვა, რომ მოზარდობიდან სექსუალიზების მსხვერპლად იქცა, ამის და საკუთარი სხეულის უარყოფითად აღქმის გამო კი 2022 წელს სოციალური ქსელებიც დატოვა.

"არ მოვიხდი ბოდიშს იმის გამო, რომ გავიზარდე", — აცხადებს ბრაუნი ვიდეოში, — "არ მოვიკუნტები მხოლოდ იმიტომ, რომ იმ ხალხის არარეალისტურ მოლოდინებს მოვერგო, რომელიც გოგოს ქალად ჩამოყალიბებას ვერ ეგუება. არ შემრცხვება საკუთარი გარეგნობის ან ჩაცმულობის გამო. იმ საზოგადოებად ვიქეცით, სადაც სხვისი გაკრიტიკება კომპლიმენტის თქმაზე ბევრად ადვილია. მოდით, უკეთ მოქცევა ვცადოთ. მხოლოდ ჩემთვის კი არა, ყველა იმ გოგოსთვის, რომელიც იმსახურებს, ისე იზრდებოდეს, რომ, უბრალოდ, არსებობის გამო გაკიცხვის არ ეშინოდეს".