Washington Post აშშ-ის პრეზიდენტის ადმინისტრაციის წყაროზე დაყრდნობით ავრცელებს ინფორმაციას, რომ შესაძლოა, ტრამპმა უკრაინას სამხედრო დახმარების მიწოდება სრულად შეუწყვიტოს, რის მიზეზადაც ოვალურ კაბინეტში 28 თებერვალს პრეზიდენტ ვოლოდიმირ ზელენსკისთან შელაპარაკება სახელდება.

გადაწყვეტილების მიღების შემთხვევაში, უკრაინას აღარ გადაეცემა მილიარდობით დოლარის რადარები, სამხედრო ტექნიკა, საბრძოლო მასალები და ჭურვები, რომლებიც ომში მყოფი ქვეყნისთვის დახმარების სახით გასაგზავნად იყო მომზადებული.

გამოცემის შეფასებით, სამხედრო დახმარების შეწყვეტა დიდი შემობრუნების ინდიკატორი იქნება, რომელიც კიდევ ერთხელ გაუსვამს ხაზს უკრაინის პრეზიდენტსა და დონალდ ტრამპს შორის ურთიერთობების გაუარესებას.

წყარომ უარყოფითი პასუხი გასცა კითხვას იმასთან დაკავშირებით, იყო თუ არა დაგეგმილი კონფრონტაცია უკრაინის პრეზიდენტთან და განაცხადა, რომ პირიქით, შრომა იყო გაწეული იმისათვის, რომ შეხვედრას უფრო პოზიტიური ტონი ჰქონოდა — წინა დღეს დონალდ ტრამპმა უარყო ისიც, რომ ვოლოდიმირ ზელენსკის "დიქტატორი" უწოდა.