ინტერპრესნიუსის ცნობით, მიუხედავად მისი მოთხოვნისა, ნეტგაზეთისა და ბათუმელების უკანონოდ დაკავებული დამფუძნებელი მზია ამაღლობელი ჯერ ისევ "ვივამედში" რჩება და პენიტენციურ დაწესებულებაში გადაყვანილი არ არის.

ადვოკატ ჯუბა ქათამაძის ცნობით, უკანონოდ დაკავებული ჟურნალისტი კლინიკიდან უკვე გაწერეს და თავად გადაყვანას ითხოვს, თუმცა პენიტენციური სამსახური ჯერ ამას არ აკეთებს.

"მზია ამაღლობელი ისევ "ვივამედშია", იქ ვნახე. არ ვიცი, რა ხდება, ექიმების მიერ გაწერილია, თვითონ ითხოვს გადაყვანას და პენიტენციურს არ გადაჰყავს", — განაცხადა ადვოკატმა.

ინფორმაციისთვის, მზია ამაღლობელმა, რომელიც ბათუმის პოლიციის უფროსის, ირაკლი დგებუაძისთვის სილის გაწვნის ფაქტზე, პოლიციელზე თავდასხმის ბრალდებით დააკავეს, შიმშილობის შეწყვეტის გადაწყვეტილება 38-ე დღეს მიიღო.