კიევში რუსეთის სრულმასშტაბიანი შეჭრის მესამე წლისთავზე ევროკომისიის ხელმძღვანელი ურსულა ფონ დერ ლაიენი და ევროსაბჭოს პრეზიდენტი ანტონიო კოშტა უკრაინის პარტნიორების სამიტზე ჩავიდნენ.

ევროკავშირის ცენტრალური ორგანოების ხელმძღვანელებს სადგურზე უკრაინის პრეზიდენტის აპარატის უფროსი ანდრეი ერმაკი და საგარეო საქმეთა მინისტრი ანდრეი სიბიჰა დახვდნენ.

ურსულა ფონ დერ ლაიენმა X-ზე რკინიგზის სადგურზე მათი დახვედრის ვიდეო გამოაქვეყნა და დაწერა, რომ "რუსეთის სასტიკი შემოჭრის მე-3 წლისთავზე ევროპა კიევშია".

"ჩვენ დღეს კიევში ვართ, რადგან უკრაინა ევროპაა.

გადარჩენისთვის ბრძოლაში მხოლოდ უკრაინის ბედი არ არის სასწორზე.

ეს არის ევროპის ბედი", — წერს ფონ დერლაიენი.

უკრაინის პრეზიდენტმა ვლადიმირ ზელენსკიმ კვირას გამართულ პრესკონფერენციაზე განაცხადა, რომ 24 თებერვალს უკრაინის პარტნიორების სამიტს 13 ქვეყნის ლიდერი, მათ შორის ჩრდილოეთ ევროპის ქვეყნების ლიდერები, დაესწრებიან, კიდევ 24 ლიდერი კი სამიტში მონაწილეობას ვიდეოჩართვის საშუალებით მიიღებს.