პუბლიკის ცნობით, შსს-მ ადმინისტრაციული სამართალწარმოება დაიწყო გიორგი მონავარდისაშვილის მიმართ, რომლის მანქანასაც 2 თებერვალს "თბილისი მოლთან" გამართულ აქციაზე სამართალდამცველები მიცვივდნენ და ხელებს ურტყამდნენ.

თათუშა არველაძე სოციალურ ქსელში ავრცელებს ვიდეოს, რომლიდანაც ირკვევა, რომ შსს-მ გიორგი მონავარდისაშვილი ადმინისტრაციულ სამართალდარღვევათა კოდექსის 123-ე მუხლის მე-4 ნაწილის დარღვევისთვის დააჯარიმა, რაც მანქანის გაჩერების შესახებ პოლიციის მოთხოვნის შეუსრულებლობას გულისხმობს და სასჯელის სახით 1500-ლარიან ჯარიმას და მართვის უფლების 1 წლით შეჩერებას ითვალისწინებს.

მონავარდისაშვილს ადმინისტრაციული სამართალწარმოების ოქმი შეუდგინეს ამავე კოდექსის 173-ე მუხლის (მე-2 ნაწილის) დარღვევაზეც, რაც პოლიციის შეურაცხყოფას გულისხმობს — საქმე სასამართლომ უნდა განიხილოს.

2 თებერვალს გიორგი მონავარდისაშვილმა განაცხადა, რომ "თბილისი მოლთან" შეკრებილ ხალხს სიგნალით სოლიდარობას უცხადებდა, რის გამოც ნიღბიანი პოლიციელები მას აგინებდნენ და ემუქრებოდნენ, შემდეგ კი ავტომობილს ნიღბიანი პირები მისცვივდნენ.