უკრაინის პრეზიდენტმა ვოლოდიმირ ზელენსკიმ საუდის არაბეთში გამართულ აშშ-ისა და რუსეთის მოლაპარაკებებზე ისაუბრა. ზელენსკი არ მალავს, რომ უკმაყოფილოა მოლაპარაკების უკრაინის გარეშე გამართვით და ხაზი გაუსვა, რომ უკრაინის სახელმწიფო არასდროს დათანხმდება რუსეთის ულტიმატუმებს:

"მაქვს განცდა, რომ მოლაპარაკებები ახლა იგივე ხასიათით მიმდინარეობს — ამჯერად რუსეთისა და აშშ-ის წარმომადგენლებს შორის. უკრაინის შესახებ, ისევ უკრაინაზე და უკრაინის გარეშე. მაინტერესებს, რატომ ჰგონიათ, რომ უკრაინა ახლა მიიღებს ამ ულტიმატუმებს, თუ ჩვენ მათზე უარი ყველაზე რთულ პერიოდში ვთქვით?" — განაცხადა ვოლოდიმირ ზელენსკიმ.

ვოლოდიმირ ზელენსკიმ განაცხადა ისიც, მას არავისთვის არავითარი გარანტიები არ მიუცია.

"როგორც უკრაინის პრეზიდენტს, მე არასდროს მიმიცია არანაირი გარანტიები ვინმესთვის ან დამიდასტურებია რაიმე. უფრო მეტიც, მე არასდროს მქონდა განზრახული, რუსეთის ულტიმატუმები მიმეღო და ამას არც ვაპირებ", — აღნიშნა უკრაინის პრეზიდენტმა.

დღეს, 18 თებერვალს რუსმა და ამერიკელმა დიპლომატებმა საუდის არაბეთში, უკრაინის წარმომადგენლის გარეშე, მოლაპარაკებები გამართეს.

ჟურნალისტი ალექს რაუფოღლუ აქვეყნებს დოკუმენტს, რომელშიც აღნიშნულია ის პუნქტები, რომლებზეც რუსული და ამერიკული მხარეები შეთანხმდნენ.

დოკუმენტის თანახმად, მხარეები შეთანხმდნენ, რომ შექმნიან საკონსულტაციო მექანიზმს, რომელიც აშშ-ისა და რუსეთის დიპლომატიური მისიების ოპერირების ნორმალიზებაზე იმუშავებს. ასევე, შეიქმნება "მაღალი რანგის" გუნდები, რომლებიც იმუშავებენ რუსეთის უკრაინაში მიმდინარე აგრესიის შეჩერებაზე.

ფოტო: Alex Raufoglu

სხვადასხვა დიპლომატიურ წყაროზე დაყრდნობით, Fox News წერს, რომ უკრაინისათვის ხელახალი არჩევნების ჩატარების იძულება სამშვიდობო შეთანხმების საკვანძო პუნქტი შეიძლება იყოს. წყაროს ცნობით, ორივე მხარე თვლის, რომ პრეზიდენტ ვოლოდიმირ ზელენსკის ხელახლა არჩევის დაბალი შანსი აქვს.

შეხვედრის შემდეგ კომენტარი გააკეთა რუსეთის საგარეო საქმეთა სამინისტროს პრესსპიკერმა, მარია ზახაროვამაც — ზახაროვას განცხადებით, უკრაინის NATO-ში გაწევრიანება რუსეთისთვის მიუღებელია და ჩრდილოატლანტიკურმა ორგანიზაციამ უკან უნდა წაიღოს 2008 წელს ბუქარესტის სამიტზე გაცემული პირობა იმის შესახებ, რომ უკრაინა ორგანიზაციის წევრი აუცილებლად გახდება.