რუსეთის საგარეო საქმეთა მინისტრმა, სერგეი ლავროვმა ორშაბათს განაცხადა, რომ მოლაპარაკებების დროს უკრაინისთვის ტერიტორიების დათმობებზე საუბარი არ შეიძლება. ამის შესახებ ინფორმაციას რუსული მედია ავრცელებს.

"შეხედეთ რა სისასტიკეს სჩადიან ტერიტორიებზე და გინდათ, რომ მოლაპარაკებების დროს რაიმე აზრი შეიძლება ჰქონდეს იმაზე საუბარს, რომ ზოგიერთი ტერიტორია შეიძლება კიდევ დავთმოთ? როგორ უნდა დავთმოთ? რუსი ხალხით, თუ ხალხის გარეშე? თუ მხოლოდ იშვიათი ლითონებით?" — განაცხადა მან მოსკოვში გამართულ პრესკონფერენციაზე.

მისივე თქმით, მოლაპარაკებების მაგიდასთან ევროპული ქვეყნების ადგილი არაა.

"დაე, ვინც ფანტაზიორობს იმაზე, თუ როგორ შეუძლია აშშ-ს სიტუაციის დარეგულირება, მაგრამ ჩვენ არ ვმალავთ, რომ ეს შესაძლებელია, მით უმეტეს, რომ აშშ-მა უკრაინის კრიზისში თავიდანვე მთავარი როლი ითამაშა. არ ვიცი მათ, ევროპულმა ქვეყნებმა მოლაპარაკებების მაგიდასთან რა უნდა გააკეთონ. თუ ისინი კონფლიქტის გაყინვის შესახებ ცბიერი იდეების წამოყენებას აპირებენ, როგორც ეს მათ სჩვევიათ და მხედველობაში ომის გაგრძელება აქვთ, მაშინ რატომ უნდა მოიწვიონ ისინი?", — განაცხადა ლავროვმა.

შეგახსენებთ, რომ 18 თებერვალს, საუდის არაბეთში აშშ-ს და რუსეთის ოფიციალური პირებს შორის შეხვედრა იგეგმება. რუსეთის პრეზიდენტის, ვლადიმერ პუტინის პრესმდივანმა დიმიტრი პესკოვმა ეს ინფორმაცია დაადასტურა. მისი თქმით, რუსეთის საგარეო საქმეთა მინისტრი სერგეი ლავროვი და რუსეთის პრეზიდენტის თანაშემწე იური უშაკოვი სამშაბათს ერ-რიადში აშშ-ის წარმომადგენლებს შეხვდებიან.

მისივე თქმით, ლავროვი და უშაკოვი ვლადიმერ პუტინის დავალებით ორშაბათს საუდის არაბეთის დედაქალაქში ჩაფრინდებიან.

აშშ-ს მოლაპარაკებებში წარმოადგენენ სახელმწიფო მდივანი მარკ რუბიო, ეროვნული უსაფრთხოების მრჩეველი მაიკ უოლცი და პრეზიდენტის სპეციალური წარმომადგენელი ახლო აღმოსავლეთში სტივ ვიტკოფი.

უკრაინა ელ რიადში დაგეგმილ მოლაპარაკებებში არ მონაწილეობს. მარკო რუბიოს თქმით, ეს არის წინასწარი მოლაპარაკებები, ხოლო როცა უკრაინის სამშვიდობო შეთანხმებაზე რეალური მოლაპარაკებები დაიწყება, მასში ჩართული უნდა იყვნენ კიევი და ევროპა.