მზია ამაღლობელის ადმინისტრაციული საქმის პროცესი გადაიდო, რადგან სასამართლომ ნეტგაზეთისა და ბათუმელების უკანონოდ დაკავებული დამფუძნებელი და მისი ადვოკატი პროცესზე დისტანციურად ვერ ჩართო.

ბათუმელების ჟურნალისტის, ჯაბა ანანიძის თქმით, ადმინისტრაციული სამართალდარღვევის ოქმი და თანდართული მასალები დაცვის მხარეს ამ დრომდე არ ჩაბარებია.

"ეს დაადასტურა შსს-მ დღევანდელ სხდომაზე, სანამ ის გადაიდებოდა. სასამართლომ ვერ განმარტა, რატომ ვერ მოხერხდა მზია ამაღლობელის დისტანციურად ჩართვა. რატომ არ გადაუციათ ოქმი და მასალები, მკაფიო პასუხი არ გაუციათ შსს-ის წარმომადგენლებს. რაც შეეხება დაკავების ოქმს, ეს ოქმი არის გაყალბებული", — აცხადებს ჯაბა ანანიძე.

შეგახსენებთ, რომ მზია ამაღლობელი პოლიციამ 11 იანვარს ორჯერ დააკავა. პირველად საპროტესტო შინაარსის პლაკატის გაკვრის გამო, მეორედ კი ბათუმის პოლიციის უფროს ირაკლი დგებუაძისთვის სილის გაწვნისთვის პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. მან დააკმაყოფილა პროკურატურის შუამდგომლობა აღკვეთის ღონისძიების სახით პატიმრობის გამოყენებაზე. დაცვის მხარე მზად იყო, გირაოს სახით უზრუნველეყო 100 000 ლარის ღირებულების უძრავი ქონების მობილიზება.

მზია ამაღლობელის გამოკითხვას საქართველოს ახალგაზრდა იურისტთა ასოციაციის ხელმძღვანელი ნონა ქურდოვანიძე დაესწრო. მისი თქმით, პოლიციის განყოფილებაში ადგილი ჰქონდა მზია ამაღლობელზე არაადამიანურ მოპყრობას.

ნეტგაზეტისა და ბათუმელების დამფუძნებელი 37-ე დღეა შიმშილობს.