კლინიკა "ვივამედთან" ნეტგაზეთისა და ბათუმელების უკანონოდ დაკავებული დამფუძნებლის, ჟურნალისტ მზია ამაღლობელის სოლიდარობის აქცია გაიმართა. აქციის მონაწილეებმა მხარდაჭერა გამოუცხადეს პოლიტიკური ნიშნით დაკავებულ, მოშიმშილე ჟურნალისტს და მისი გათავისუფლება მოითხოვეს.

ფოტო: NEWS.On.ge

შეგახსენებთ, რომ მზია ამაღლობელი პოლიციამ 11 იანვარს ორჯერ დააკავა. პირველად საპროტესტო შინაარსის პლაკატის გაკვრის გამო, მეორედ კი ბათუმის პოლიციის უფროს ირაკლი დგებუაძისთვის სილის გაწვნისთვის პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. მან დააკმაყოფილა პროკურატურის შუამდგომლობა აღკვეთის ღონისძიების სახით პატიმრობის გამოყენებაზე. დაცვის მხარე მზად იყო, გირაოს სახით უზრუნველეყო 100 000 ლარის ღირებულების უძრავი ქონების მობილიზება.

მზია ამაღლობელის გამოკითხვას საქართველოს ახალგაზრდა იურისტთა ასოციაციის ხელმძღვანელი ნონა ქურდოვანიძე დაესწრო. მისი თქმით, პოლიციის განყოფილებაში ადგილი ჰქონდა მზია ამაღლობელის მიმართ არაადამიანურ მოპყრობას.

მზია ამაღლობელი 35-ე დღეა შიმშილობს.