შოუს დროს ახალგაზრდა მომღერლის მკვლელობისა და გეი კლუბზე თავდასხმის შემდეგ, ორლანდო ისევ მსოფლიო მედიის ყურადღების ცენტრში მოექცა. ამჯერად საქმე უბედურ შემთხვევას ეხება. რამდენიმე საათის წინ, ორლანდოს სიახლოვეს, Walt Disney Hotel-ში, ტბის პირას, ალიგატორი თავს დაესხა 2 წლის ბავშვს, რომელიც წყალში მშობლებთან ერთად იმყოფებოდა.

როგორც CNN ადგილობრივ პოლიციაზე დაყრდნობით, წერს, ბავშვი ტბის პირას მშობლებთან ერთად იმყოფებოდა, მისგან ერთი ნაბიჯის მოშორებით იდგა მამაც, რომელმაც მტაცებლისგან შვილის დახსნა სცადა, თუმცა, უშედეგოდ. მას ხელზე მცირე დაზიანებები აღენიშნება. ალიგატორმა ბავშვი წყალში შეათრია. მაშველები უკვე რამდენიმე საათია უშედეგოდ ეძებენ ბავშვს. წყვილი ნებრასკადან ფლორიდაში 2 და 4 წლის შვილებთან ერთად დასასვენებლად იყო ჩასული.

დასასვენებელი კომპლექსი Walt Disney Hotel ტბის პირასაა აშენებული. მიუხედავად იმისა, რომ ფლორიდის ტბებსა და მდინარეებში ალიგატორები ცხოვრობენ, ადგილობრივი მედიის ცნობით, მსგავსი თავდასხმის ფაქტი აქამდე არ დაფიქსირებულა.