რესპუბლიკელი კონგრესმენი ჯო უილსონი ტულსი გაბარდს ეროვნული დაზვერვის დირექტორად დანიშვნას ულოცავს. მისი თქმით, ტულსი გაბარდს ესმის ივანიშვილის რეჟიმის ეროვნული უსაფრთხოებისადმი ღრმა საფრთხე.

"ვულოცავ ტულსი გაბარდს ეროვნული დაზვერვის დირექტორად დანიშვნას. დირექტორი გაბარდი თბილისს ეწვია, როგორც წარმომადგენელთა პალატის წევრი და ესმის ივანიშვილის რეჟიმის ეროვნული უსაფრთხოებისადმი ღრმა საფრთხე. მადლობელი ვიყავი იგი პრეზიდენტ სალომე ზურაბიშვილისადმი წარმედგინა", — წერს უილსონი X-ზე.

აშშ-ის სენატმა ეროვნული დაზვერვის დირექტორის თანამდებობაზე დონალდ ტრამპის მიერ წარდგენილი ტალსი გაბარდი 12 თებერვალს დაამტკიცა. ის აბარდი აშშ-ის პრეზიდენტის მიერ კაბინეტისთვის შერჩეული კანდიდატებიდან ერთ-ერთი ყველაზე მოულოდნელი არჩევანი იყო, მისი პოლიტიკური წარსულიდან გამომდინარე.

აბარდის კანდიდატურის მიმართ კითხვის ნიშნებს იწვევდა მისი არასაკმარისი მხარდაჭერა უკრაინის მიმართ, ასევე 2017 წელს სირიის დიქტატორ ბაშარ ალ-ასადთან შეხვედრა და, არც მეტი, არც ნაკლები, საიდუმლო მასალების გაჟონვაში ბრალდებული ედვარდ სნოუდენის მხარდაჭერა.

გაბარდი ეროვნული გვარდიის ვიცე-პოლკოვნიკია და ორჯერ მსახურობდა ახლო აღმოსავლეთში. 2020 წელს ის პრეზიდენტობისთვის იბრძოდა. მას არა აქვს სადაზვერვო სამსახურებში მუშაობის გამოცდილება და არასოდეს უხელმძღვანელია სამთავრობო სააგენტოსთვის ან დეპარტამენტისთვის.