მზად ვართ, უკრაინის მიმართ მხარდაჭერა გავაძლიეროთ. ჩვენ ერთგული ვართ მისი დამოუკიდებლობის, სუვერენიტეტისა და ტერიტორიული მთლიანობის მიმართ რუსეთის აგრესიული ომის ფონზე, — ამის შესახებ გაერთიანება "ვაიმარი+" ავრცელებს განცხადებას.

"ვაიმარი+"-ის ფორმატის შემადგენლობაში ვაიმარის ქვეყნების — საფრანგეთის, გერმანიისა და პოლონეთის გარდა, გაერთიანებულია — იტალია, ესპანეთი, გაერთიანებული სამეფო, უკრაინა და ევროკომისია. განცხადებას ასევე უერთდება ევროკავშირის უმაღლესი წარმომადგენელი, ევროპული კომისიის ვიცეპრეზიდენტი კაია კალასი.

განცხადებაში ნათქვამია, რომ უნდა გაგრძელდეს უკრაინის მხარდაჭერა “სამართლიანი, ყოვლისმომცველი და ხანგრძლივი მშვიდობის მიღწევამდე”.

"ჩვენ ვიზიარებთ მიზანს, გავაგრძელოთ უკრაინის მხარდაჭერა სამართლიანი, ყოვლისმომცველი და ხანგრძლივი მშვიდობის მიღწევამდე. მშვიდობა, რომელიც უზრუნველყოფს უკრაინის და ჩვენი ინტერესების გარანტიას.

ჩვენ მოუთმენლად ველით ჩვენს ამერიკელ მოკავშირეებთან ერთად მომავალი გზის განხილვას. ჩვენი საერთო მიზნები უნდა იყოს უკრაინის ძლიერ მდგომარეობაში დაყენება. უკრაინა და ევროპა უნდა იყვნენ ნებისმიერი მოლაპარაკების ნაწილი. უკრაინას უნდა მიეცეს უსაფრთხოების ძლიერი გარანტიები. უკრაინაში სამართლიანი და ხანგრძლივი მშვიდობა აუცილებელი პირობაა ძლიერი ტრანსატლანტიკური უსაფრთხოებისთვის.

შეგახსენებთ, რომ ევროპის კონტინენტის უსაფრთხოება ჩვენი საერთო პასუხისმგებლობაა. ამიტომ ჩვენ ერთად ვმუშაობთ ჩვენი კოლექტიური თავდაცვის შესაძლებლობების გასაძლიერებლად", — ნათქვამია განცხადებაში.

მანამდე აშშ-ის პრეზიდენტმა, დონალდ ტრამპმა სოციალურ პლატფორმა Truth Social-ზე დაწერა, რომ ვლადიმერ პუტინთან "ხანგრძლივი და ძალიან პროდუქტიული" საუბარი გამართა და შეთანხმდა, რომ უკრაინაში მიმდინარე ომის დასასრულებლად სამშვიდობო მოლაპარაკებებს დაიწყებენ.