დონალდ ტრამპსა და ვლადიმირ პუტინს შორის პირველი ოფიციალური სატელეფონო საუბარი შედგა, რომელიც საათ-ნახევარი გაგრძელდა.

აშშ-ის პრეზიდენტის განცხადებით, რუს კოლეგასთან "ხანგრძლივი და ძალიან პროდუქტიული" საუბარი გამართა და შეთანხმდა, რომ უკრაინაში მიმდინარე ომის დასასრულებლად სამშვიდობო მოლაპარაკებებს დაიწყებენ — ამის შესახებ დონალდ ტრამპმა საკუთარ სოციალურ პლატფორმა Truth Social-ზე დაწერა.

"ჩვენ ვისაუბრეთ უკრაინაზე, ახლო აღმოსავლეთზე, ხელოვნურ ინტელექტზე, დოლარის ძალასა და სხვა თემებზე. ვისაუბრეთ ჩვენ ხალხების დიდებულ ისტორიაზე და იმაზე თუ როგორ წარმატებით ვიბრძოდით ერთმანეთის გვერდიგვერდ მეორე მსოფლიო ომში" — წერს ტრამპი.

საუბარი დაადასტურა კრემლის პრესსპიკერმა დიმიტრი პესკოვმაც — მისი თქმით, საუბარი 1.5 საათი გაგრძელდა და მხარეებმა მოლაპარაკებების დაწყების შესახებ პრინციპულ თანხმობას მიაღწიეს. ამასთანავე, პესკოვის თქმით, რუსეთის პრეზიდენტმა დონალდ ტრამპი მოსკოვში მიიწვია.