6 თებერვალს აშშ-ის სახაზინო დეპარტამენტმა შემოიღო სანქციები საერთაშორისო ქსელზე, რომელსაც, სავარაუდოდ ირანული ნავთობი ჩინეთში გაჰქონდა.

სანქციები შეეხებათ კერძო პირებს ჩინეთში, ინდოეთსა და არაბთა გაერთიანებულ საამიროებში, ასევე, არაერთ ნავთობის ტანკერს. სახაზინო დეპარტამენტის ცნობით, ქსელი უზრუნველყოფდა ასეულობით მილიონი დოლარის ღირებულების, მილიონობით ბარელი ნავთობის შეტანას ირანიდან ჩინეთში.

სახაზინო დეპარტამენტის ნაბიჯი პირდაპირი გაგრძელებაა დონალდ ტრამპის მიერ 2 დღის წინ ხელმოწერილი მემორანდუმისა, რომლის თანახმადაც, ირანის ისლამური რესპუბლიკის წინააღმდეგ "მაქსიმალური ზეწოლა" დაწესდა. მემორანდუმმა მოუწოდა სახაზინო დეპარტამენტს, რომ ირანის ნავთობის ექსპორტი ნულამდე შეამციროს.

ხაზინის მდივანმა სკოტ ბესენტმა 6 თებერვალს გაკეთებულ განცხადებაში ირანი ნავთობით მიღებული შემოსავლით ბირთვული პროგრამის დაფინანსებაში, ბალისტიკური რაკეტების წარმოებაში, უპილოტო საფრენი აპარატების შექმნასა და ახლო აღმოსავლეთში ტერორისტული ორგანიზაციების დაფინანსებაში დაადანაშაულა. ირანის პრეზიდენტმა, მასუდ ფეზეშქიანმა ბრალდებების პასუხად განაცხადა, რომ ირანი ბირთვული იარაღის შექმნას არ ცდილობს.

ასევე იხილეთ: ფეზეშქიანი პასუხობს ტრამპს და აცხადებს, რომ ირანი ბირთვული იარაღის შექმნას არ ცდილობს