ჩინეთის საგარეო უწყება პასუხობს დონალდ ტრამპის განცხადებებს იმასთან დაკავშირებით, რომ აშშ ღაზის სექტორს "გადაიბარებს და შექმნის იქ სივრცეს, რომლითაც მთელი ახლო აღმოსავლეთი ძალიან იამაყებს".

ოფიციალური პეკინის განცხადებით, პალესტინა პალესტინელებმა უნდა მართონ და სწორედ ეს არის კონფლიქტისშემდგომი ღაზის მმართველობის ფუნდამენტური პრინციპი.

"ჩვენ ვეწინააღმდეგებით ღაზის მოსახლეობის იძულებით გადაადგილებას. იმედი გვაქვს, ჩართული მხარეები გამოიყენებენ ცეცხლის შეწყვეტით მიღებულ შესაძლებლობას და დააბრუნებენ პალესტინის საკითხს სწორ, "ორი ერი — ორი სახელმწიფოს" გადაწყვეტის გზაზე, რათა ახლო აღმოსავლეთში ხანგრძლივი მშვიდობა დამყარდეს. ღაზა პალესტინის ტერიტორიის განუყოფელი ნაწილია და არავის აქვს უფლება, მისი მოსახლეობის ბედი განსაზღვროს", — განაცხადა ჩინეთის საგარეო საქმეთა სამინისტროს პრესსპიკერმა ლინ ძიენმა.

შეგახსენებთ, აშშ-ის პრეზიდენტმა, დონალდ ტრამპმა გუშინ განაცხადა, რომ შეერთებული შტატები ღაზას სექტორზე კონტროლს დააწესებს და განადგურებული ანკლავის აღდგენას უზრუნველყოფს.