საქართველოს ახალგაზრდა იურისტთა ასოციაციის თავმჯდომარე, ნონა ქურდოვანიძე, კომენტარს აკეთებს ბათუმელებისა და ნეტგაზეთის უკანონოდ დაკავებული დამფუძნებლის, მზია ამაღლობელის მდგომარეობასთან დაკავშირებით, რომელიც გუშინ საჭირო კვლევებისთვის კლინიკა "ვივამედში" გადაიყვანეს.

ნონა ქურდოვანიძის თქმით, მზია ამაღლობელის ადვოკატს დღეს პალატაში დახვდა საჭმელი, რომელიც პაციენტს დაუტოვეს, მისი უარის მიუხედავად, რაც ფსიქოლოგიური ზეწოლის ფორმაა. შეგახსენებთ, მზია ამაღლობელი 25-ე დღეა შიმშილობს.

"დღეს მზია ამაღლობელი კლინიკაში მოინახულა საია-ს ადვოკატმა. მზიას პალატაში ადვოკატს დახვდა მზიასთვის კლინიკის მიერ შეტანილი საკვები. მოშიმშილე პატიმარს შეუტანეს საჭმელი და მიუხედავად იმისა, რომ მზიამ უარი თქვა მის მიღებაზე, იქვე დაუტოვეს. ეს არის ფსიქოლოგიური ზეწოლის დამატებითი ფორმა.

მზია კატეგორიულად ითხოვს, რომ თუ კვლევები დასრულებულია, დააბრუნონ ციხეში. ის არ შიმშილობს იმიტომ, რომ ამის გამო რაიმე შეღავათი მიიღონ.

მოშიმშილე პატიმრის კლინიკაში გადაყვანის საკითხი რეგულირდება კანონმდებლობით და მისი დაცვა ევალება სახელმწიფოს", — აცხადებს საიას თავმჯდომარე.