ქართული ოცნების წევრმა, მამუკა მდინარაძემ 3 თებერვალს ბრიფინგზე საკანონმდებლო ცვლილებები დააანონსა. მმართველი პარტიის გადაწყვეტილებით, მკაცრდება რეგულაციები როგორც სისხლის, ისე ადმინისტრაციულ სამართალდარღვევათა კოდექსში.

იმავე დღეს იურიდიულ საკითხთა კომიტეტმა პირველი მოსმენით დაუჭირა მხარი სისხლისა და ადმინისტრაციულ სამართალდარღვევათა კოდექსში ცვლილებებს დღეს კი "ოცნების" პარლამენტმა პირველი მოსმენით დაუჭირა მხარი ადმინისტრაციულ და სისხლის სამართლის კოდექსებსა და შეკრება-მანიფესტაციების კანონში რეპრესიულ ცვლილებებს.

ადმინისტრაციული პასუხისმგებლობა წესდება საჯარო-პოლიტიკური პირის შეურაცხყოფაზე და სისხლის სამართლის დანაშაული ხდება საჯარო-პოლიტიკური პირისადმი მუქარა და საქმიანობასთან დაკავშირებით თავდასხმა.

საკანონმდებლო ცვლილებების მიხედვით, წვრილმანი ხულიგნობისთვის, ვანდალიზმისთვის, სამართალდამცავი ორგანოს წარმომადგენლის მოთხოვნის დაუმორჩილებლობის და მათი შეურაცხყოფისთვის, სასამართლოს შესასვლელების ბლოკირებისთვის და სხვა მსგავსი ადმინისტრაციული კანონდარღვევისთვის იზრდება ჯარიმები და ასევე იზრდება ადმინისტრაციული პატიმრობის ვადა 15 დღიდან 60 დღემდე. ამასთან, აქციების ჩატარება იკრძალება დახურულ სივრცესა და შენობებში, მესაკუთრის თანხმობის გარეშე.

"ყველასთვის ცნობილია, თუ რა მოვლენები ვითარდება ჩვენი ქვეყნის ქუჩებში და რას აორგანიზებენ, ვინ აორგანიზებს – ერთი მხრივ მშვიდობიანი პროტესტის ფარგლებში ფსევდოლიბერალური და ლიბერალურ ფაშიზმით, რეალურად თავისუფლების სახელით შენიღბული, მთელი რიგი ქმედებები ხორციელდება, მათ შორის, ეს არა მხოლოდ უშუალოდ რომელიმე ქმედების განხორციელებაში, არამედ ე.წ. ბულინგშიც გამოიხატება. აღარ დარჩა ზღვარი და ის მოცემულობა და ის მორალური სტანდარტი არ დაერღვიოთ. ყველაფერზე არიან წამსვლელები, არაფერს დაგიდევენ და ადამიანების შეურაცხყოფაზე ხომ არ იხევენ უკან და განსაკუთრებით ეს ყველაფერი მიმართულია ჩვენ სამართალდამცველების, სახელმწიფო-პოლიტიკური თანამდებობის პირების და საჯარო მოხელეების მიმართ, იმ ადამიანების მიმართ, ვინც არ ჰყვებიან თითიდან გამოწვეულ ცრუ კამპანიას და ეს ადამიანები არიან ბულინგის მსხვერპლნი და პირდაპირი შეურაცხყოფა და ზღვარსგადასული მოწოდებები მიმდინარეობს მათ მიმართ. მნიშვნელოვანია, გარკვეული საკანონმდებლო ცვლილებები განხორციელდეს", – განაცხადა პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ კანონპროექტთა პაკეტის წარდგენისას.

ქართული ოცნების ერთ-ერთი ლიდერმა, მამუკა მდინარაძემ 3 თებერვალს გამართულ ბრიფინგზე დეტალურად ისაუბრა კონკრეტულად რა რეგულაციები მკაცრდება ზემოთხსენებულ კანონებში. მისივე თქმით, ერთ-ერთი სიახლე ის არის, რომ სისხლის სამართლის წესით დასჯადი გახდება პოლიტიკური თანამდებობის პირზე, სახელმწიფო მოსამსახურეზე, საჯარო მოსამსახურეზე თავდასხმა ან ძალადობის მუქარა.

"მკაცრდება მთელი რიგი რეგულაციები პირველ რიგში, ადმინისტრაციულ სამართალდარღვევათა კოდექსში, მათ შორის, მაგალითად, მესაკუთრის წინასწარი თანხმობის გარეშე იკრძალება დახურულ სივრცეში, შენობებში, აქციების ჩატარება; წვრილმანი ხულიგნობისთვის, ვანდალიზმისთვის, სამართალდამცავი ორგანოს წარმომადგენლის მოთხოვნის დაუმორჩილებლობის და მათი შეურაცხყოფისთვის, სასამართლოს შესასვლელების ბლოკირებისთვის და სხვა მსგავსი ადმინისტრაციული კანონდარღვევისთვის ჯარიმები იზრდება და ასევე, იზრდება ადმინისტრაციული პატიმრობის ვადა 60 დღემდე. ადმინისტრაციულ სამართალდარღვევად განისაზღვრება სახელმწიფო პოლიტიკური პირის, საჯარო მოსამსახურის სიტყვიერი შეურაცხყოფა მის საქმიანობასთან დაკავშირებით, რისთვისაც ასევე მკაცრი სანქციები განისაზღვრება.

სისხლის სამართლის კოდექსშიც გვექნება მთელი რიგი ცვლილებები, რომლებიც განპირობებულია ფსევდო ლიბერალების ფაშისტური ქმედებების პრევენციის მიზნით, რასაც მრავლად ვხედავთ ბოლო პერიოდის განმავლობაში. კერძოდ ძალადობრივი ქმედებებისკენ საჯაროდ მოწოდება აქამდე ისჯებოდა მხოლოდ ჯარიმით და საზოგადოებისთვის სასარგებლო შრომით, არსებული ცვლილებით ამ ქმედებისთვის განისაზღვრება პატიმრობა 3 წლამდე ვადით. იზრდება სისხლის სამართლებრივი პატიმრობის ვადა პოლიციელების მიმართ წინააღმდეგობის, მუქარის და ძალადობისთვის, ეს გადავა მძიმე დანაშაულების კატეგორიაში, 5 წლიდან 6 წლამდე. ასევე, მკაცრდება სანქცია პოლიციელზე, ხელისუფლების წარმომადგენლებზე და მათი ოჯახის წევრებზე თავდასხმისთვის, ჯგუფურობის, არაერთგზისობის, საშიში საშუალებით განხორციელების შემთხვევაში. ანუ, ეს კონკრეტული გარემოებები გადავა დამამძიმებელ გარემოებებში და ამაზე შედარებით მკაცრი სანქცია იქნება, როგორც დამამძიმებელ გარემოებებზე. სასჯელი იზრდება პოლიციელის ჯანმრთელობის ხელყოფის ფაქტზეც. სისხლის სამართლის წესით დაისჯება და ეს ახალი ნორმა იქნება, პოლიტიკური თანამდებობის პირზე სახელმწიფო მოსამსახურეზე, საჯარო მოსამსახურეზე თავდასხმის ან ძალადობის მუქარის ჩამდენი პირიც. ასევე, არაერთი ადმინისტრაციული სახდელი გვექნება მათ შორის გამკაცრების მიმართულებით", — განაცხადა მდინარაძემ.

ოცნების პარლამენტი ცვლილებებს დაჩქარებულად განიხილავს, რაც იმას ნიშნავს, რომ პარლამენტი პროცედურით დადგენილ სამივე მოსმენას და კენჭისყრას მიმდინარე სასესიო კვირაში დაასრულებს.