შინაგან საქმეთა სამინისტროს განსაკუთრებულ დავალებათა დეპარტამენტის (გდდ) ოპერატიული დაგეგმვის სამმართველოს ყოფილი უფროსის ირაკლი შაიშმელაშვილი ძმა ბახვა შაიშმელაშვილი სამსახურიდან გაათავისუფლეს. ინფორმაციას რადიო თავისუფლება ავრცელებს.

ბახვა შაიშმელაშვილი ლაგოდეხის მუნიციპალიტეტის საკრებულოში ვიდეო ოპერატორის და მემონტაჟის პოზიციაზე მუშაობდა.

როგორც რადიო თავისუფლება წერს, შაიშმელაშვილი ლაგოდეხის საკრებულოში 2022 წლის აპრილიდან, ხელშეკრულებით იყო დასაქმებული.

ლაგოდეხის საკრებულოს თავმჯდომარე კახა ჯამბურიამ დაადასტურა, რომ ბახვა შაიშმელაშვილს ხელშეკრულების ვადა 2025 წლის 31 იანვარს ამოეწურა და მასთან ახალი ხელშეკრულება აღარ გააფორმეს.

"ყველას ვერ გაათავისუფლებთ, ყველას ვერ დააშინებთ, ყველას ვერ გააჩუმებთ. მდაბიო პოლიტიკა გაქვთ," — ასე გამოეხმაურა ირაკლი შაიშმელაშვილი სოციალურ ქსელში ძმის, ბახვა შაიშმელაშვილის სამსახურიდან გათავისუფლებას.