კოალიცია ცვლილებისთვის ერთ-ერთი ლიდერის, ნიკა მელიას განცხადებით, მათი გაერთიანების ფინანსური პარტნიორი არა მხოლოდ ნიკა გილაური, არამედ "სხვადასხვა ტიპისა და მასშტაბის" დონორები არიან, — ამის შესახებ ნიკა მელიამ TV პირველის ეთერში ისაუბრა.

მისი თქმით, დაფინანსების მიუხედავად არც ერთ დონორს პარტიის პოლიტიკურ პროცესებზე გავლენა არ ჰქონია.

"აქ საუბარია 10 მილიონ ლარზე. ყველა პარტიას, რომელმაც ბარიერი გადალახა და ვერ გადალახა, ბოლო წლების განმავლობაში გაცილებით მეტი აქვს დახარჯული, ღმერთმა ხელი მოუმართოს, რეჟიმთან ბრძოლაში ფინანსები არის აუცილებელი კომპონენტი და ლიდერების ფუნქციაც ეს არის... ძალიან გამიხარდებოდა, რომ მომდევნო საარჩევნო კამპანიაში რეჟიმის წინააღმდეგ, ეს არჩევნები ჩატარდება ან მათი აქტიური მონაწილეობით ან მათ გარეშე, ორჯერ მეტი ფინანსური რესურსიც მოვიპოვოთ, მაგრამ ამ კოალიციას, ამ პარტიას ჰყავს ბევრი სხვადასხვა ტიპის შემომწირველი, ბევრი სხვადასხვა ტიპის დონორი, მაგრამ მადლობა ღმერთს - არც ერთს მათი მხრიდან პოლიტიკური გავლენა ამ პროცესზე არ ჰქონია." — ამბობს მელია.

მელია ასევე აცხადებს, რომ მისთვის მიუღებელია ოლიგარქიული გაველენები და თუ რამე აძლიერებს პროცესში - მორალური უპირატესობაა.

გადაცემაში ყოფილი პრემიერის, ნიკა გილაურისა და მისი ძმის, ირაკლი გილაურის შესახებ დასმულ კითხვაზე მელიამ თქვა, რომ "არ არის საუბარი მხოლოდ ნიკა გილაურზე, ბევრი სხვადასხვა ტიპის და მასშტაბის პარტნიორი ჰყავს კოალიცია ცვლილებისთვის."

"რთულია ფინანსების მობილიზება, ურთულესია, ისევე არის ურთულესი, როგორც ახლა რამდენიმე ფონდი ოპერირებს, მაგრამ ჩემი ინფორმაციით, დღეში 40 000 ლარიდან 50 000 ლარამდე მარტო ჯარიმებში ხარჯავს ორი ფონდი - ნიკა გილაურისა და ნანუკა ჟორჟოლიანის. ამ ლოგიკით, ეს თანხა საიდან აკუმულირდება. ბევრი ადამიანია, ვინც ქვეყნის შიგნიდან და გარედან რეალურად რეჟიმის მოწინააღმდეგე ძალებს დახმარებას უჩენს და იმედი მაქვს, რომ მეტს შევძლებთ მომავალში.

ვამბობ გულწრფელად, აქ არ არის საუბარი მხოლოდ ნიკა გილაურზე, ბევრი სხვადასხვა ტიპის და მასშტაბის პარტნიორი ჰყავს კოალიცია ცვლილებებს და გადახედეთ ჩვენს საარჩევნო სიას, პარტიას, სადაც ერთი ადამიანი მაინც თუ არსებობს, ან ცუდი გაგებით ბიზნესთან დაკავშირებული და ამიტომ არის სიაში, ან ფულის გამო." — განაცხადა მელიამ.

მისივე თქმით, აღნიშნულ თემაზე "ის ადამიანები ნუ დასვამენ კითხვებს, მათ შორის, ბარიერგადალახული პოლიტიკური ჯგუფი, სიაში ადგილების გაყიდვა ტრადიციად რომ დაამკვიდრეს."