ხულოში, შავნაბადას მთაზე; თელავის მუნიციპალიტეტის სოფელ ართანასთან და თუშეთში, სოფელ ხახაბოსთან ტყეებში ხანძრის ჩაქრობის სამუშაოები ამ დრომდე გრძელდება. ინფორმაციას საქართველოს შინაგან საქმეთა სამინისტრო ავრცელებს.

უწყების ინფორმაციით:

  • ხულოში, შავნაბადას მთაზე ცეცხლის კერებთან უკვე შეყვანილია შსს-ს საგანგებო სიტუაციების მართვის სააგენტოს 200-ზე მეტი მეხანძრე-მაშველი და განსაკუთრებულ დავალებათა დეპარტამენტის 300 თანამშრომელი, ცეცხლის ქრობის პროცესში ჩაერთვება შსს-ს ვერტმფრენი;
  • კახეთის რეგიონში, თელავის მუნიციპალიტეტის სოფელ ართანასთან, ტყის მასივში, სადაც შსს-ს ასობით თანამშრომელია მობილიზებული. ადგილზე ცეცხლის დაქრობით სამუშაოებში ჩართულია სამი ვერტმფრენიც;
  • თუშეთში, სოფელ ხახაბოსთან არსებულ ტყეში, ხანძრის ძირითადი კერები უკვე ლოკალიზებულია და ამ ეტაპზე ვერტმფრენის გამოყენების აუცილებლობა აღარ არსებობს. ცეცხლის სალიკვიდაციო სამუშაოებს, ალტერნატიული ცეცხლმაქრი საშუალებების გამოყენებით, ცოცხალი ძალა ცდილობს;
  • შილდის ტყეში კი - შსს-ს მეხანძრე-მაშველები ნახანძრალი ნიადაგის პრევენციულ დამუშავებას ახდენენ.

კახეთში, სოფელ ართანაში; ყვარელში, სოფელ შილდაში; მთა-თუშეთში, სოფელ ხახაბოსთან ხანძარი 2 სექტემბერს გაჩნდა.