ქარიშხალ ირმას გაძლიერების გამო ფლორიდას შტატსა და პუერტო-რიკოში საგანგებო მდგომარეობა გამოცხადდა. ირმა ახლა მეოთხე კატეგორიის ქარიშხლად იქცა, წერს CNN.

მიუხედავად იმისა, რომ ქარიშხლის ზუსტი მიმართულება უცნობია, სავარაუდო საშიშროების გამო ფლორიდის გუბერნატორმა საგანგებო მდგომარეობა გამოაცხადა. გუბერნატორის თქმით, ის ესაუბრა აშშ-ის პრეზიდენტ დონალ ტრამპს, რომელმაც ქარიშხალ ირმასთან გასამკლავებლად ყველა რესურსი შესთავაზა.

ორშაბათს, 4 სექტემბერს პუერტო-რიკოს გუბერნატორმაც საგანგებო მდგომარეობა გამოაცხადა და ეროვნული გვარდიაც მოიყვანა მზადყოფნაში, ასევე, გაუქმებულია სასწავლო პროცესიც. ადგილობრივი მედიის ცნობით, ქარიშხალი ირმა შესაძლოა, პუერტო-რიკოს ოთხშაბათს შუადღისთვის დაატყდეს თავს.

ქარიშხალ ირმას სიჩქარე უკვე საათში 220 კილომეტრია.

აშშ-ს ქარიშხლების ეროვნული ცენტრის ინფორმაციით, ირმა საკმაოდ შთამბეჭდავია. ის კაბო-ვერდეს ტიპის ქარიშხალია, რომელიც ატლანტიკის ოკეანის აღმოსავლეთით, კაბო-ვერდეს კუნძულებთან ყალიბდება. მსგავსი ტიპის ქარიშხალი ერთ-ერთი ყველაზე ძლიერი და ინტენსიურია.