სანამ აშშ-ში ქარიშხალ ჰარვით მიყენებულ ზიანს უმკლავდებიან, ატლანტის ოკეანეში ქარიშხალი ირმა აქტიურდება, რომელიც კარიბის აუზის ქვეყნებისთვის დიდი საფრთხეს წარმოადგენს. შეიძლება, შეერთებულ შტატებს ის შემდეგ კვირას დაატყდეს თავს, წერს CNN.

ოთხშაბათს ირმას ტროპიკული ქარიშხალი უწოდეს, ხოლო ხუთშაბათს კი მესამე კატეგორიის დიდი ქარიშხლის სტატუსი მიანიჭეს, რადგან სიჩქარემ საათში 185 კილომეტრს მიაღწია.

აშშ-ს ქარიშხლების ეროვნული ცენტრის ინფორმაციით, ირმა საკმაოდ შთამბეჭდავია. ის კაბო-ვერდეს ტიპის ქარიშხალია, რომელიც ატლანტიკის ოკეანის აღმოსავლეთით, კაბო-ვერდეს კუნძულებთან ყალიბდება. მსგავსი ტიპის ქარიშხალი ერთ-ერთი ყველაზე ძლიერი და ინტენსიურია.

ქარიშხლების ეროვნული ცენტრის თქმით, ირმა დასავლეთისკენ ხუთი დღის განმავლობაში ივლის და ბოლო, მეხუთე დღეს, კარიბის ზღვასთან მეოთხე კატეგორიის სიძლიერის ქარიშხლად ჩამოყალიბდება.

სპეციალისტები კარიბის აუზის ქვეყნებს მოუწოდებენ, ყურადღებით იყვნენ და თვალ-ყური ადევნონ ქარიშხალს, რათა მომზადებულები შეხვდნენ მის დამანგრეველ ძალას.