"მზია ამაღლობელმა ჩაიდინა დანაშაული და ამდენი ხნის განმავლობაში არ მომისმენია, თუნდაც, სინანული, რომ გამოსულიყო ადამიანურად და ეთქვა, შეცდომა დავუშვი და მაპატიეთ, მოგისმენიათ ეს?", — ამის შესახებ ქალაქის მერმა კახა კალაძემ მიხეილ მესხის სახელობის სტადიონზე ჟურნალისტებთან საუბრისას განაცხადა.

ამას გარდა, კალაძემ კიდევ ერთხელ გადაუხადა მადლობ ირაკლი დგებუაძეს, როგორც ღირსეულ პოლიციელს.

"მზია ამაღლობელმა პოლიციელს ხელი დაარტყა. პოლიციელზე თავდასხმა, ხელის დარტყმა არის კატეგორიულად მიუღებელი. ადამიანები ვართ, შეცდომა შეიძლება მოუვიდეს ყველას. ჩაიდინა დანაშაული და ამდენი ხნის განმავლობაში არ მომისმენია და არავის მოუსმენია თუნდაც სინანული, თუნდაც გამოსულიყო ადამიანურად და ეთქვა, შეცდომა დავუშვი და მაპატიეთ, მოგისმენიათ ეს?

…ირაკლი დგებუაძე არის ღირსეული პოლიციელი. მე მინდა ვისარგებლო შემთხვევით, შსს-ს, თითოეულ თანამშრომელს გადავიხადო მადლობა. ყველა იმ ადამიანს , ვინც იცავს სახელმწიფოებრიობას და ვინც იცავს წესრიგს ქვეყანაში. არავის არ მიეცემა იმის უფლება, რომ მოაწყოს არეულობა, ქვეყანაში მოაწყოს რევოლუციები", – განაცხადა კახა კალაძემ.

მიხეილ მესხის სახელობის სტადიონზე ოცნების პრემიერი ირაკლი კობახიძე, ქალაქის მერი კახა კალაძე, ფეხბურთის ფედერაციის პრეზიდენტი ლევან კობიაშვილი და კიდევ რამდენიმე მაღალჩინოსანი სპორტული საზოგადოების წევრებს შეხვდნენ. ამ შეხვედრას პროტესტის გარეშე არ ჩაუვლია. "თავისუფლება მზია ამაღლობელს" — ამ მოთხოვნით და შეძახილებით სტადიონთან ჟურნალისტები იყვნენ შეკრებილი და ბათუმელების და ნეტგაზეთის თანადამფუძნებლისა და დირექტორის, მზია ამაღლობელის გათავისუფლებას ითხოვდნენ.