ილონ მასკის სამუშაო დღე იმის ფიქრში (და ტვიტინგში) დაიწყო, თუ რა იქნება შემდეგი უდიდესი გლობალური კონფლიქტის გამომწვევი მიზეზი.

Tesla-სა და SpaceX-ის CEO-მ, ორშაბათს, ტვიტების სერიაში გაგვაფრთხილა, რომ მესამე მსოფლიო ომის სავარაუდო გამომწვევი ხელოვნური ინტელექტი იქნება, რადგან ქვეყნებს შორის კონკურენცია ტექნოლოგიებში ძალიან სწრაფად იზრდება.

მასკის ერთ-ერთი უდიდესი შიში სწორედ ხელოვნური ინტელექტის რისკებს ეხება. მან ივლისში განაცხადა, რომ ხელოვნური ინტელექტი არის „უდიდესი რისკი, რომლის წინაშეც ჩვენ, ცივილიზაცია ვდგავართ“. მასკმა მთავრობებს მოუწოდა, თვალყური ადევნონ ხელოვნური ინტელექტის განვითარებას.

მასკის ბოლო კომენტარები ვლადიმერ პუტინის განცხადებას ეხებოდა, რომელმაც თქვა, რომ რომელი ქვეყანაც ლიდერი გახდება ხელოვნური ინტელექტის სფეროში, ის „გახდება მსოფლიოს მმართველი“.

მასკის თქმით, მესამე მსოფლიო ომი შესაძლოა ხელოვნურმა ინტელექტმა გამოიწვიოს ისე, როგორც WarGames-ის სცენარშია. „[ომს] არა მხოლოდ ქვეყნის ლიდერები გამოიწვევენ, არამედ ხელოვნური ინტელექტებიც, თუ ისინი გადაწყვეტენ, რომ პირველი შეტევა ყველაზე დიდი ალბათობით მოუტანთ გამარჯვებას“, ამბობს მასკი.