დღეს გამართულ სასამართლო სხდომაზე კოალიცია ცვლილებისთვის წევრი საბა სხვიტარიძე პატიმრობაში დატოვეს. აღნიშნული გადაწყვეტილება თბილისის საქალაქო სასამართლოს მოსამართლე ნატო ხუჯაძემ მიიღო.

პროკურორი როინ ხინთიბიძის თქმით, საქმეზე ვიდეოჩანაწერია წარმოდგენილი, სადაც ჩანს, როგორ ურტყამს თავში რაღაც ნივთს სხვიტარიძე პოლიციის თანამშრომელს, რამაც პოლიციელის ჯანმრთელობის დაზიანება გამოიწვია, მას თავი ჰქონდა გატეხილი.

სხდომაზე ბრალდებულმა თქვა, რომ პოლიტიკური პატიმარია და პროცესიც პოლიტიკურ ხასიათს ატარებს.

"ობიექტური გადაწყვეტილების იმედი არ მაქვს, პოლიტიკური პატიმარი ვარ და ეს პროცესიც პოლიტიკურ ხასიათს ატარებს. პატარა იმედი მაქვს, რომ სასამართლო პატარა ლოიალობას გამოიჩენს. დამაკავეს იმის გამო, რომ მე და ჩემთან ერთად მყოფებს თავს დაგვესხა ე.წ. "ტიტუშკა", რომელსაც არანაირი ამომცნობი საშუალება არ ეკეთა, "კაპიუშონი" ეცვა, პირბადე ეკეთა, მან იძალადა ქალზე, გვაგინებდა, მე ის მოვიგერიე. ამის შემდეგ გამიტაცეს, იძალადეს ჩემზე და განყოფილებაში ორჯერ მაწამეს, ამის შემდეგ მკაცრი რეჟიმის იზოლატორში გამამწესეს. პოლიციელზე ძალადობა დამაბრალეს, რაც აბსურდია. თუ ვინმეა დამნაშავე, ის "ტიტუშკა" მირიან ქავთარაძეა. ამ საქმეში დაზარალებულადაც მცნეს და არც ერთი პოლიციელი არაა დაკავებული", — განაცხადა სხვიტარიძემ.

სამოქალაქო აქტივისტი საბა სხვიტარიძე სისხლის სამართლის წესით 5 დეკემბერს დააკავეს. მას ბრალად პოლიციელის ჯანმრთელობის ხელყოფა წარუდგინეს. თბილისის საქალაქო სასამართლომ 6 დეკემბერს ცხვიტარიძეს აღკვეთის ღონისძიების სახით პატიმრობა შეუფარდა. საქმეზე მომდევნო სასამართლო პროცესი 28 იანვარს გაიმართება.