სერბეთის პრემიერმინისტრი მილოშ ვუჩევიჩი გადადგა რამდენიმეთვიანი სახალხო პროტესტის შემდეგ, რომელიც მას შემდეგ დაიწყო, რაც ნოემბერში მატარებლის სადგურის ჭერის ჩამონგრევას 15 ადამიანი ემსხვერპლა — ექსპერტები მომხდარში ხელისუფლებაში არსებულ კორუფციას ადანაშაულებენ.

ვუჩევიჩმა თანამდებობა მას შემდეგ დატოვა, რაც 27 იანვარს პრეზიდენტმა ალექსანდარ ვუჩიჩმა მთავრობის რეკონსტრუქციის შესახებ გეგმები გამოაცხადა.

მიუხედავად ამისა, ვუჩევიჩის განცხადებით, მისი გადაწყვეტილების მიზეზი ნოვი სადში მომხდარი შემთხვევის ხილვა გახდა, სადაც მომიტინგე სტუდენტებს თავს დაესხნენ.

"მთავრობამ უნდა აჩვენოს პასუხისმგებლობის უმაღლესი დონე. იმისათვის, რომ დაძაბულობამ საზოგადოებაში უფრო არ იმატოს, მე მივიღე გადაწყვეტილება [გადადგომის შესახებ]", — განაცხადა ვუჩევიჩმა.

27 იანვარს დემონსტრანტებმა ბელგრადის სატრანსპორტო კვანძი 24 საათით გადაკეტეს, რითაც ხელისუფლებაზე ზეწოლა მნიშვნელოვნად გაზარდეს. პროტესტს ტრაქტორებით შეუერთდნენ სერბი ფერმერებიც.

მიმდინარე პროტესტი მნიშვნელოვანი წინაღობაა სერბეთის პროგრესული პარტიისთვის (SNS), რომელიც აქამდე ხელისუფლებას მყარად აკონტროლებდა.