ქართველმა მომღერალმა ნინი ბრეგვაძემ, რომელსაც მსმენელი სასცენო სახელით Nini Iris იცნობს, 2025 წლის ევროვიზიაზე საქართველოს წარდგენის სურვილი გამოთქვა. ნინის თქმით, საკონკურსო სიმღერა უკვე დაწერა და გაუგზავნა პირველ არხს, რომელიც საქართველოს წარმომადგენლის შერჩევაზეა პასუხისმგებელი.

"ხალხის დიდი თხოვნიდან გამომდინარე, და ასევე ჩემი სურვილით, ვყოფილიყავი საქართველოს წარმომადგენელი ევროვიზიაზე, დავწერე სიმღერა და გავუგზავნე პირველ არხს. ველოდები პასუხს. მიყვარხართ", — წერს მუსიკოსი სოციალურ ქსელში.

ნინი ევროვიზიის ქართველ ფანებში ერთ-ერთ ყველაზე სასურველ კანდიდატურად მოიაზრება. თუმცა, ჯერჯერობით უცნობია, როგორ შეირჩევა საქართველოს წარმომადგენელი და სიმღერა წლევანდელი ევროვიზიისთვის, რომელსაც შვეიცარიის ქალაქი ბაზელი უმასპინძლებს მაისში.

რაც შეეხება ნინის, იგი მსოფლიო მასშტაბით 2023 წელს გაიცნეს, როცა ამერიკულ ვოისში მიიღო მონაწილეობა. "ბრმა ქასთინგზე" სიმღერის შესრულების შემდეგ, ნინის ოთხივე მწვრთნელი ოვაციებით შემოუტრიალდა. ირლანდიელმა პოპვარსკვლავმა ნაილ ჰორანმა, რომელიც ნინიმ მოგვიანებით თავის მენტორად აირჩია, ქართველ მუსიკოსს "პოტენციური გამარჯვებული" უწოდა. Nini Iris პროექტს ნახევარფინალიდან გამოეთიშა, მაგრამ მან ამერიკელი ტელემაყურებლის დიდი მხარდაჭერა დაიმსახურა.

ნინი ბრეგვაძე საქართველოდან ნიუ-იორკში საცხოვრებლად და მუსიკალური კარიერის გასაგრძელებლად 2016 წელს გადავიდა. მუსიკოსის თქმით, უცხო ქვეყანაში თავის დასამკვიდრებლად გრძელი და რთული გზა გაიარა.

მანამდე, 2015 წელს, 18 წლის მომღერალი ქართული X ფაქტორის მეორე სეზონში გამოჩნდა და კონკურსის ფინალისტიც გახდა. გამორჩეული ვოკალური შესაძლებლობების მქონე მუსიკოსმა, რომელიც, ამავდროულად, ცეკვავდა და რეპავდა, მეგაშოუს ჟიური და მაყურებელი ერთნაირად აღაფრთოვანა.

ნინის გამოშვებული აქვს სამი სინგლი: Rhythm Of My Heartbeat (2019), Fade Away (2022) და Psycho (2024).

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...