მოსკოვში, ამერიკის საელჩოს მიმდებარედ, რუსი გეი წყვილი იმ დროს დააკავეს, როცა ისინი ორლანდოში რამდენიმე დღის წინ მომხდარი ტრაგედიის შედაგად დაზარალებულთა მიმართ თანაგრძნობის გამოსახატად მივიდნენ. ამის შესახებ ინფორმაციას გაზეთ RBK-ზე დაყრდნობით France 24 ავრცელებს.

გაზეთის სოციალური მედიის რედაქტორი, ისლამ აბდულაბეკოვი, თავის შეყვარებულ ფელიქს გლიუკმანთან ერთად ცდილობდა საელჩოსთან ყვავილები და შეტყობინება დაეტოვებინა წარწერით - "Love wins - Stay with Orlando". სწორედ ამ დროს ისინი დააკავეს.

„პოლიციამ დაუყოვნებლივ დაგვაკავა და ჩაგვსვა მანქანაში ე.წ. არასანქცირებული აქციისთვის“ - ამბობს აბდულაბეკოვი, - „ჩვენ უბრალოდ გვსურდა მწუხარება გამოგვეხატა ამ ადამიანების მკვლელობასთან დაკავშირებით და საერთოდ არ დაგვიგეგმავს რაიმე სახის პოლიტიკური აქტივობა.“

დაკავებულებმა ფეისბუკზე პოლიციის მანქანაში გადაღებული ფოტოები ატვირთეს და დაწერეს: „დაუჯერებელია, შევეცადეთ ყვავილები დაგვეტოვებინა საელჩოსთან. მცდელობა წარუმატებლად დასრულდა“.

ყვავილების თაიგული და სანთლები მოსკოვში, ამერიკის საელჩოსთან არაერთმა მოქალაქემ დატოვა მას შემდეგ, რაც 12 ივნისს, ომარ მარტენმა ფლორიდის ქალაქ ორლანდოში, გეი კლუბში 49 ადამიანი მოკლა.

მკვლელობაზე პასუხისმგებლობაც ე.წ. ისლამურმა სახელმწიფომ აიღო. რუსეთის პრეზიდენტმა, ვლადიმერ პუტინმა ფაქტს „ბარბაროსული დანაშაული“ უწოდა.

თუმცა გეი უფლებათა დემონსტრაცია რუსეთში მუდმივად იკრძალება. ჰომოსექსუალობა, რუსეთში, 1993 წლამდე სისხლის სამართლის დანაშაულად ითვლებოდა. 1999 წლამდე კი, ფსიქიკურ დაავადებად.

ლგბტ საზოგადოება რუსეთში კვლავ იტანჯება ფართოდ გავრცელებული ჰომოფობიის გამო.