17 იანვარს, 16:00 საათზე, შსს-ს შენობასთან ირაკლი დგებუაძისათვის უფლებამოსილების შეჩერების მოთხოვნით მედიის აქცია გაიმართება. აქციის მთავარი მოთხოვნებია, გათავისუფლდეს მზია ამაღლობელი და ირაკლი დგებუაძეს შეუჩერდეს აჭარის ა/რ პოლიციის დეპარტამენტის ბათუმის საქალაქო სამმართველოს უფროსის უფლებამოსულება.

ბათუმელებისა და ნეტგაზეთის დამფუძნებლის, მზია ამაღლობლის, ცნობით, მისი დაკავების შემდეგ ირაკლი დგებუაძე მას აყენებდა სიტყვიერ შეურაცხყოფას, ხოლო შემდეგ პოლიციის განყოფილებაში რამდენჯერმე შეეცადა, მას ფიზიკურად გასწორებოდა, თუმცა, პოლიციის სხვა თანამშრომლებმა შეძლეს ირაკლი დგებუაძის შეკავება და მისი ოთახიდან გაყვანა. ირაკლი დგებუაძე რამდენჯერმე შევიდა ოთახში და აგრძელებდა აგრესიულ მოპყრობას მის მიმართ, ერთ-ერთი ასეთი შესვლისას, მან მზია ამაღლობელს სახეში შეაფურთხა. ასევე, მისი ბრაძანების შესაბამისად, მზია ამაღლობელს გარკვეული დროის განმავლობაში არ ეძლეოდა წყლის დალევის და საპირფარეშოთი სარგებლობის საშუალება.

14 იანვარს ბათუმის საქალაქო სასამართლომ დააკმაყოფილა პროკურატურის შუამდგომლობა და მზია ამაღლობელს აღკვეთის ღონისძიების სახით პატიმრობა შეუფარდა. მზია ამაღლობელი სისხლის სამართლის კოდექსით 12 იანვარს დააკავეს ბათუმში მიმდინარე საპროტესტო აქციაზე. მას 4-დან 7 წლამდე პატიმრობა ემუქრება.