"გააგონე სიმართლე რეჟიმის დამცველს" — დღეს, 14 საათზე, სახალხო დამცველ, ლევან იოსელიანის ოფისთან საპროტესტო აქცია გაიმართება.

"საქართველოში ადამიანის უფლებები მასობრივად ირღვევა, ხოლო სახალხო დამცველი, რომელიც ჩვენი უფლებების მთავარი დამცველი უნდა იყოს, რეჟიმის დამცველად იქცა!

წამება და ძალადობა ნორმად იქცა – არაერთი ადამიანი დაექვემდებარა არაადამიანურ მოპყრობას, ცემას და წამებას. მიუხედავად ამისა, ლევან იოსელიანი აცხადებს, რომ "სისტემური წამება ვერ დაინახა".

არჩევნები ტოტალურად გაყალბდა – ამას არ უარყოფს არც ჩვენი საზოგადოება და არც საერთაშორისო თანამეგობრობა. მიუხედავად ამისა, სახალხო დამცველმა გაყალბების ფაქტებს "ჰაერიდან მოტანილი სისულელე" უწოდა!

ეს უკვე აღარ არის უბრალოდ დუმილი – ეს უსამართლობის გამართლებაა! ამ ქმედებით, ლევან იოსელიანი ხდება მოძალადე რეჟიმის თანამონაწილე.
ამიტომ, 17 იანვარს, 14 სთზე, ვმართავთ საპროტესტო აქციას - "გააგონე სიმართლე რეჟიმის დამცველს" — ნათქვამია ორგანიზატორების განცხადებაში.