4 დეკემბერს, მარი ბროსეს ქუჩაზე დაკავებული დავით გედენიძე, რომელიც ერთიანი ნაციონალური მოძრაობის ახალგაზრდული ორგანიზაციის წევრია, მოსამართლე კობა ჩაგუნავამ სამართალდამრღვევად არ ცნო და მის მიმართ საქმის წარმოება შეწყდა. დავით გედენიძე ადმინისტრაციული წესით იყო დაკავებული.

სასამართლო დარბაზიდან გამოსული დავით გედენიძე ტვ პირველთან აცხადებს, რომ მოსამართლის ასეთ გადაწყვეტილებას არ ელოდა,

"არ ველოდებოდი, რა თქმა უნდა, უბრალოდ მოწმეების დაკითხვა იმდენად არ შეესაბამებოდა ერთმანეთს და იმდენად უაზრო ასე ვთქვათ, ილაპარაკეს, რომ მოსამართლემ მიიღო მართლაც, რომ სამართლიანი გადაწყვეტილება, რადგან არაფერი მსგავსი მე არ გამიკეთებია, რასაც მოწმეები იძახდნენ.

ამიტომ, რა ვიცი, კმაყოფილი ვარ ძალიან. არ ველოდი, მაგრამ, როგორც მე გამასამართლეს, ისე უნდა იყვნენ სხვებიც, რადგან, როგორც არის ჩემი ძმა [გუშინწინ დააკავეს], მასაც რაღაცებს აბრალებდნენ, მაგრამ მოვა დრო და გამოვლენ. და ეს მოსამართლეები, როგორც დღეს, სამართლიან გადაწყვეტილებებს მიიღებენ ამის მერე", – განაცხადა გედენიძემ ტვ პირველთან საუბრისას.

შეგახსენებთ, რომ დავით გედენიძე 4 დეკემბერს მარი ბროსეს ქუჩაზე მაშინ დააკავეს, როცა შინაგან საქმეთა სამინისტროს თანამშრომლები პარტიების ოფისებსა და აქტივისტების სახლში ჩხრეკის მიზნით შევიდნენ.