ბათუმელებისა და ნეტგაზეთის დამფუძნებელსა და დირექტორს, მზია ამაღლობელ დაკავებას კოალიცია ქალებისთვის ჟურნალისტიკაში (CFWIJ) ორგანიზაცია ეხმაურება და გმობს მის დაკავებასა და პატიმრობაში დატოვებას. მათი თქმით, ეს პრესის თავისუფლებაზე უხეში თავდასხმაა.

კოალიცია ქალებისთვის ჟურნალისტიკაში მზია ამაღლობელის წინააღმდეგ წაყენებული ბრალდების მოხსნას და საქართველოში დამოუკიდებელი ჟურნალისტების დევნის შეწყვეტას მოითხოვს.

ორგანიზაცია წერს, რომ ბათუმელებისა და ნეტგაზეთის დირექტორი მზია ამაღლობელი ბათუმში ორჯერ დააკავეს. მას ახლა პოლიციის უფროსზე თავდასხმაში ედება ბრალი, ბრალდება 4-7 წლით თავისუფლების აღკვეთას ითვალისწინებს. ამაღლობელმა შეატყობინა პოლიციის მხრიდან არასათანადო მოპყრობის შესახებ და დაპატიმრებულს საათების განმავლობაში უარს ეუბნებოდნენ ადვოკატთან დაკავშირებაზე.

"მიუხედავად იმისა, რომ მისმა დაცვის მხარემ 100 000 ლარის (35 340 დოლარი) გირაოს მოთხოვნა შესთავაზა, მოსამართლე ნინო სახელაშვილმა უარყო შეთავაზება და მას წინასწარი პატიმრობა შეუფარდა. ამაღლობელს სასამართლოში ხელში ეჭირა მარია რესას წიგნი "როგორ დავამარცხო დიქტატურა", როგორც წინააღმდეგობის სიმბოლო, შემდეგი სასამართლო სხდომა 4 მარტს არის ჩანიშნული.

კოალიცია ქალებისთვის ჟურნალისტიკაში გმობს ამაღლობელის დაკავებას. ეს არის უხეში თავდასხმა პრესის თავისუფლებაზე. ნოემბერში საპროტესტო გამოსვლების დაწყების შემდეგ, ათობით ქალმა ჟურნალისტმა განიცადა შევიწროება და პოლიციის მხრიდან ძალადობა - ამაღლობელი და მისი კოლეგები ადგილზე იმყოფებოდნენ და ადასტურებდნენ ბათუმში ხელისუფლების მიერ უსამართლო დაკავებებს.

მოვითხოვთ მის წინააღმდეგ წაყენებული ბრალდების მოხსნას და საქართველოში დამოუკიდებელი ჟურნალისტების დევნის შეწყვეტას", — ნათქვამია გავრცელებულ განცხადებაში.