თქვენ ვერ მოიყვანთ ვერცერთ მაგალითს, რომ თუნდაც პარლამენტარი ან რომელიმე თანამდებობის პირი მოქალაქეს თავს დასხმოდა, — ასე გამოეხმაურა თბილისის მერი კახა კალაძე 13 იანვარს, აბუ-დაბიში სასტუმროს სასადილოში მომხდარ ინციდენტს, სადაც ქართული ოცნების დეპუტატები — ირაკლი ზარქუა, ვიქტორ სანიკიძე და გელა სამხარაული მოქალაქე ლაშა გაბიტაშვილს ფიზიკურად დაუპირისპირდნენ.

"დეპუტატი, თანამდებობის პირი არავის ესხმის თავს. რა თქმა უნდა, ვნახე და არავის ეპატიება, არც სიტყვიერი და არც ფიზიკური შეურაცხყოფა. თქვენ ვერ მოიყვანთ ვერცერთ მაგალითს, რომ თუნდაც პარლამენტარი ან რომელიმე თანამდებობის პირი მოქალაქეს თავს დასხმოდა. არავის აქვს უფლება მივიდეს ადამიანთან, რომელიც თავისთვის ზის, საუზმობს და სიტყვიერი შეურაცხყოფა მიაყენოს. ძალადობა ჩემთვის მიუღებელია, არაერთხელ გამიკეთებია განცხადება. როდესაც შეურაცხყოფა ხდება, ამას ყოველთვის მოჰყვება რეაგირება, ეს ყველამ უნდა გაიგოს. თქვენ ცდილობთ დანერგოთ ტენდენცია, თუ ვინმე თანამდებობის პირს ვიღაც შეურაცხყოფას აყენებს, თავი უნდა ჩაღუნოს და წავიდეს, ეს ვერ მოხდება. ძალადობას ყოველთვის შესაბამისი პასუხი გაეცემა", — განაცხადა კახა კალაძემ.

ცნობისათვის, გუშინ, 12 იანვარს ლაშა გაბიტაშვილმა აბუ-დაბიდან გაავრცელა რამდენიმე ვიდეო, სადაც ოცნების დეპუტატები — ირაკლი ზარქუა, ვიქტორ სანიკიძე, გოჩა ენუქიძე და გელა სამხარაული ჩანან. გაბიტაშვილი დეპუტატებს თბილისსა და ბათუმში აქციის მონაწილეების დაკავებებს ახსენებს, რასაც სიტყვიერი და ფიზიკური შეურაცხყოფა მოჰყვა. ამის შემდეგ, 13 იანვრის დილას, სასტუმროს სასადილოში საუზმობისას ლაშა გაბიტაშვილს ირაკლი ზარქუა და ვიქტორ სანიკიძე დაესხნენ თავს და მას ფიზიკური დაზიანებები მიაყენეს. ცოტა ხნის წინ კი სოციალურ ქსელში გავრცელდა ფოტო, სადაც ირაკლი ზარქუა აბუ-დაბის პოლიციის წარმომადგენლებთან ერთად ჩანს.