ინდონეზიის საგარეო საქმეთა სამინისტროს განცხადების მიხედვით, ინდონეზია BRICS-ის წევრი ოფიციალურად გახდა.

"BRICS-ის წევრობა სხვა განვითარებად ქვეყნებთან თანამშრომლობისა და პარტნიორობის გაძლიერების სტრატეგიული გზაა", — წერია სამინისტროს განცხადებაში.

ცნობისთვის, ინდონეზია პირველი სახელმწიფოა სამხრეთ-აღმოსავლეთ აზიის ქვეყნებიდან, რომელიც BRICS-ის წევრი გახდა.

მოგვიანებით, ალიანსში გაწევრიანებას ბრაზილიის მთავრობა განცხადებით გამოეხმაურა.

"ინდონეზია ჯგუფის სხვა წევრებთან ერთად იზიარებს გლობალური მმართველობის ინსტიტუტების მხარდაჭერას და პოზიტიურ გავლენას ახდენს გლობალურ სამხრეთში თანამშრომლობის გაღრმავებაზე", – წერია განცხადებაში.

ეკონომიკური ალიანსი BRICS-ი 2006 წელს შეიქმნა ბრაზილიის (B), რუსეთის, (R), ინდოეთისა (I) და ჩინეთის (C) ინიციატივით, ხოლო მოგვიანებით 2010 წელს, ორგანიზაციას შეემატა სამხრეთ აფრიკაც (S).

2024 წლის იანვარში ორგანიზაციაში გაწევრიანდნენ ეგვიპტე, ეთიოპია, ირანი, საუდის არაბეთი და არაბთა გაერთიანებული საამიროებიც, ამასთან ჯერჯერობით უცნობია, თუ როგორ შეიცვლება ალიანსის სახელი.