გერმანიის საგარეო საქმეთა მინისტრი ანალენა ბერბოკი სირიაში, დამასკოში ჩავიდა და ქვეყნის ახალ ხელისუფლებასთან მოლაპარაკებებს მართავს.

"ჩემი დღევანდელი მგზავრობა ჩემს ფრანგ კოლეგასთან ერთად, ევროკავშირის სახელით — არის ცხადი ნიშანი სირიელებისათვის: ეს ახალი პოლიტიკური დასაწყისია ევროპისა და სირიისთვის, გერმანიისა და სირიისთვის, ეს შესაძლებელია", — განაცხადა ანალენა ბერბოკმა.

საგარეო საქმეთა მინისტრის განცხადებით, სირიის ისტორიის ახალი ეტაპი დაიწყო.

"ასადის მმართველობის მტკივნეული ეტაპი დასრულდა. დაიწყო ახალი ეპოქა, თუმცა ჯერ დაწერილი არ არის, რადგან ამ მომენტში სირიელებს აქვთ შანსი, რომ საკუთარი ქვეყნის ბედი ისევ საკუთარ ხელებში აიღონ", — დაწერა ბერბოკმა X-ზე.

2024 წლის ბოლოს, აჯანყებულთა ჯგუფებმა, რომელთაც სათავეში ისლამისტური ჰაიათ თაჰრირ ალ-შამი (HTS) ედგა, ქვეყანაზე კონტროლი დაამყარეს და ბაშარ ალ-ასადი ქვეყნიდან გაიქცა. ამჟამად ქვეყნის გარდამავალი მთავრობის ხელმძღვანელად HTS-ის ლიდერი აჰმად ალ-შარა ითვლება.