თუმანიშვილის სახელობის კინომსახიობთა თეატრის ახალი სამხატვრო ხელმძღვანელი გიორგი სიხარულიძე იქნება, ის ქეთი დოლიძეს ჩაანაცვლებს. სამინისტროს ინფომაციით, ასევე, შეიცვალა თოჯინების თეატრის სამხატვრო ხელმღრვანელი და ის ნიკოლოზ საბაშვილი იქნება.

თბილისის თოჯინების თეატრის სამხატვრო ხელმძღვანელის ცვლილებას თეატრის თანამშრომლები არ ეთანხმებიან. მათთვის გაუგებარია, რატომ გახდა საჭირო მსგავსი ცვლილება და სამხატვრო ხელმღრვანელად ელენე მაცხონაშვილის დატოვებას ითხოვენ.

დღეს, თოჯინების თეატრის მშენებარე შენობასთან 19:00-ზე თეატრის თანამშრომლები საპროტესტო აქციის გამართვას გეგმავენ.

სამხატვრო ხელმძღვანელობიდან საკუთარ გადაყენებას არ ეთანხმება ქეთი დოლიძეც. როგორც მან On.ge-ს უთხრა, თეატრალური დასის ნაწილი კულტურის მინისტრის გადაწყვეტილებას არ ეთანხმება და სცენაზე გასვლას არ აპირებს.

24 ივლისს საქართველოს კულტურის სამინისტრომ 23 პროფესიული სახელმწიფო თეატრის სამხატვრო ხელმძღვანელების კანდიდატთა შესარჩევად კონკურსი გამოაცხადა. პროფესიული თეატრების სამხატვრო ხელმძღვანელებს ოთხწლიანი ვადით აირჩევენ.

სამინისტროს ინფორმაციით, ჯერ უცნობია როდის გახდება ცნობილი დანარჩენი 21 თეატრის ახალი სამხატვრო ხელმძღვანელი.