უფლებადამცველ ნათია თავბერიძის ინფორმაციით, აქციაზე დაკავებულ პირს, ლოგინად ჩავარდნილი დედა გარდაეცვალა. ქალის ერთადერთი მომვლელი კი სწორედ შვილი იყო

"გუშინ ერთ-ერთ აქციაზე დაზარალებული/დაკავებული პირი მოვიდა ჩვენთან. ეს ადამიანი დააკავეს, ყველაფერი წაართვეს, არსად დაარეკინეს. არადა ლოგინად მყოფი, ავადმყოფი დედისთვის ერთადერთი მომვლელი იყო. დედა გარდაიცვალა...

ამ არაადამიანურ დანაშაულებზე აუცილებლად პასუხს აგებს დღევანდელი რეჟიმი.
იცოდეთ, რომ აუცილებლად მოითხოვეთ, გაესაუბრეთ იურისტებს - დანაშაულების, წამების ფაქტების მხილება და დოკუმენტირება, გასაჩივრება აუცილებელია.

ამდენი მოპარული ნივთი, ტელეფონი - ეს კიდევ ცალკე ამბავია - თითქმის ყველა დაკავებული და ნაცემი ადამიანი, ამავდროულად გაძარცვეს კიდეც." – წერს უფლებადამცველი.

განახლება: ნათია თავბერიძის მიერ გამოქვეყნებული დამატებითი დეტალების მიხედვით,
"მეგობრებო, ძალიან ბევრმა გააზიარა პოსტი. მადლობა მხარდაჭერისთვის, სოლიდარობისთვის.

ასევე რამდენიმე დამატებითი ინფორმაცია, რადგან ბევრი მეკითხება:
1. ეს ამბავი/დაკავება მაისის აქციების დროს მოხდა და გუშინ გავიგეთ;
2. ბევრი მეკითხება - ზუსტად როდის გარდაიცვალა და ა.შ. - რა მნიშვნელობა აქვს ზუსტად როდის? მთავარი საშინელება ის არის, რომ ორი დღე დაკავებულ ადამიანს არ მისცეს დარეკვის უფლება და როგორც თვითონ გაგვიზიარა, მარტოდ მყოფი დედამისის მდგომარეობა ამ ორ დღეში ძალიან დამძიმდა".