ცნობიერია, კონტაქტი სრულიად მყარდება, თვითონ ითხოვს წამოდგომასაც, უკვე მოხერხდა თვალის ფუნქციის შეფასება, — ამის შესახებ ინგოროყვას კლინიკის კლინიკურმა დირექტორმა, კახაბერ ჭელიძემ აქციაზე დაშავებულ 22 წლის ალექსანდრე თირქიას ჯანმრთელობის მდგომარეობაზე საუბრისას განაცხადა. მისი თქმით, მხედველობის ფუნქცია, მართალია დაქვეითებულია, მაგრამ ხედავს, შეუძლია ობიექტების გარჩევაც.

"ყველა პარამეტრით გაუმჯობესება გახლავთ. ცნობიერია, კონტაქტი სრულიად მყარდება, თვითონ ითხოვს წამოდგომასაც, უკვე მოხერხდა თვალის ფუნქციის შეფასება და საბედნიეროდ, მხედველობის ფუნქცია, მართალია დაქვეითებულია, მაგრამ ფუნქცია შენახული გახლავთ. ხედავს, შეუძლია ობიექტების გარჩევაც. ასე რომ, ახლა გადაწყდება რეანიმაციიდან ჩვეულებრივ პალატაში გადაყვანის საკითხი. ჯერ არ არის გადაწყვეტილი. მისი ამჟამინდელი მდგომარეობა თავისუფლად შეთავსებადია პალატაში გადაყვანის საკითხთან", — განაცხადა კახაბერ ჭელიძემ.

ალექსანდრე თირქია 3 დეკემბერს პარლამენტი წინ გამართულ საპროტესტო აქციაზე დაშავდა. მას თვალში, სავარაუდოდ, სპეცრაზმელის მიერ ნასროლი გაზის კაფსულა მოხვდა. ის ამ დრომდე რეანიმაციულ განყოფილებაში იმყოფებოდა.