დამოუკიდებელი თეატრალური პრემია თავისუფალი წელს დაჯილდოების საზეიმო ცერემონიას არ გამართავს. ნაცვლად ამისა, გამარჯვებულები 17 დეკემბერს, საღამოს 8 საათზე, საპროტესტო აქციაზე გამოვლინდებიან.

"შექმნილი ვითარებიდან გამომდინარე, საზეიმო ცერემონია არ გაიმართება", — ნათქვამია პრემიის ორგანიზატორების განცხადებაში, — "გამარჯვებულებს გამოვავლენთ საპროტესტო დემონსტრაციაზე, იქ, სადაც დღეს ყველაზე ხმამაღლა ისმის ქართული თეატრის და მისი მაყურებლის ხმა".

რაც შეეხება ნომინანტებს, პრემიის მოკლე სია ასე გამოიყურება:

საუკეთესო სპექტაკლი

  • ბერსერკები II. მზიანი მხარე — საშემსრულებლო ხელოვნების ლაბორატორია
  • ნინო, ჩემი აფროდიტე — თეატრი ათონელზე
  • პათეტიკური მონოლოგები — თეატრალური კომპანია ჰარაკი
  • სიყვარული და ინფორმაცია — თეატრი ათონელზე
  • 1921-1924 — თეატრი სახელოსნო 42

საუკეთესო მსახიობი

  • ანი იმნაძე — ლინეინის სილამაზის დედოფალი
  • ნატალია გაბისონია — პათეტიკური მონოლოგები
  • ბექა ხაჩიძე — ბერსერკები II. მზიანი მხარე
  • თაკი მუმლაძე — ნინო, ჩემი აფროდიტე
  • ია სუხიტაშვილი — ნინო, ჩემი აფროდიტე

საუკეთესო სცენოგრაფია

  • ქეთევან ნადიბაიძე — პათეტიკური მონოლოგები
  • თამრი ოხიკიანი — ნინო, ჩემი აფროდიტე
  • მიხეილ ჩარკვიანი — სიყვარული და ინფორმაცია
  • ტატო გელიაშვილი, თათა თავდიშვილი — ადამიანის ტრაგედია
  • ლევან კვარაცხელია — დარტყმა

აღსანიშნავია, რომ ბოლო დღეებში განვითარებული მოვლენების ფონზე, ქართველი მსახიობების ნაწილი გაიფიცა და სპექტაკლებში მონაწილეობაზე უარი თქვა. მსახიობები გაფიცვით ქართული ოცნების მიერ ევროინტეგრაციის პროცესის შეჩერებას და დემონსტრანტებზე ძალადობას აპროტესტებენ.

რამდენიმე დღის წინ დააკავეს ცნობილი ქართველი მსახიობი ანდრო ჭიჭინაძეც. მას ბრალი ჯგუფურ ძალადობაში მონაწილეობის მუხლით წაუყენეს. დანაშაული სასჯელის სახედ და ზომად 4 წლიდან 6 წლამდე თავისუფლების აღკვეთას ითვალისწინებს. თავად მსახიობი ბრალს არ აღიარებს და ამბობს, რომ საქმე პოლიტიკურად მოტივირებულია, ოჯახი კი მიიჩნევს, რომ ჭიჭინაძის დაკავება "საჩვენებელი დასჯაა".

ანდრო ჭიჭინაძის დაკავების შემდეგ, 6 დეკემბერს, მსახიობებმა, რეჟისორებმა და ხელოვნებათმცოდნეებმა საპროტესტო აქციაც გამართეს თეატრალურ უნივერსიტეტთან და მარჯანიშვილის თეატრთან.