აქციის დარბევისას დაშავებულმა 22 წლის ალექსი თირქიამ მედიკამენტური ძილიდან გაიღვიძა, ამის შესახებ სოციალურ ქსელში მისმა ოჯახის წევრმა, ეკა თირქიამ დაწერა. მისი თქმით, ალექსი თირქია რეანიმაციულ განყოფილებაში რჩება, მდგომარეობა — სტაბილურად მძიმეა.

"სასიხარულო ამბავი გვაქვს...ალექსიმ, გაიღვიძა და რეაგირებს ყველაფერზე...რჩება რეანიმაციულ განყოფილებაში, სტაბილურად მძიმე, იგივე რისკებით. თუმცა, ვიცი, რომ ყველაფერი კარგად იქნება", — წერს ეკა თირქია.

ალექსი თირქია 3 დეკემბერს, გამთენიისას, თბილისში საპროტესტო აქციის დაშლისას დაშავდა.

დაშავებულის ბიძამ, იოსებ ჩანადირმა, ინგოროყვას კლინიკასთან ჟურნალისტებს განიცხადა, რომ ალექსიმ ბებიას დაურეკა და უთხრა, რომ ალყაში იყო და ამ საუბრის დროს მის მეგობარ გოგოს ფეხში, ხოლო თავად მას სახეში, წარბის არეში, მოხვდა ე.წ. გაზის კაფსული.